ხელოვნების სასახლეში გივი ბერიკაშვილის ბიუსტი გაიხსნა

კულტურა - 19:20, 18 May, 2017

9409

18 მაისს, ხელოვნების სასახლეში ქართული კინოსა და თეატრის გამორჩეული ვარსკვლავის, ყველასათვის საყვარელი მსახიობის გივი ბერიკაშვილის გარდაცვალებიდან მეორმოცე დღისადმი მიძღვნილი ღონისძიება გაიმართა. ღონისძიების ფარგლებში მუზეუმის ‘უკვდავთა ბაღში’ ხელოვანის ბიუსტი გაიხსნა.
მსახიობის უახლოესმა მეგობარმა, მოქანდაკე თემურ ჭყონიამ, გივი ბერიკაშვილის სკულპტურული პორტრეტი მის სიცოცხლეშივე შექმნა, რომელიც თბილისის მერიის ხელშეწყობით ბრინჯაოში ჩამოისხა.
ღონისძიებაზე, მსახიობის მეგობრებმა და კოლეგებმა საქართველოს სახალხო არტისტის, კოტე მარჯანიშვილისა და იპოლიტე ხვიჩიას სახელობის პრემიის ლაურეატისა და „ხელოვნების ქურუმის“ ცხოვრებას და შემოქმედება გაიხსენეს.
1956 წელს, თეატრალური ინსტიტუტის დამთავრების შემდეგ, გივი ბერიკაშვილმა სამსახიობო მოღვაწეობა სოხუმის თეატრში დაიწყო, რასაც მოჰყვა მარჯანიშვილის თეატრი, სადაც მან დაუვიწყარი სცენიური სახეები შექმნა: მეფე ერეკლე, მიტუა, ალექსანდრე ჩინჩახელი და სხვა.
მაყურებლის განსაკუთრებული სიყვარულით სარგებლობდა მისი გმირები კინოფილმებში: ‘ლონდრე’, ‘სიყვარული ყველას უნდა’, ‘ღვინის ქურდები’ და მრავალი სხვა.
2008 წელს, მარჯანიშვილის თეატრის წინ გაიხსნა გივი ბერიკაშვილის სახელობის ვარსკვლავი და გამოიცა წიგნი - „სახალხო არტისტი - გივი ბერიკაშვილი“
იგი იყო ქალაქ თბილისის საპატიო მოქალაქე.