არ იჩხუბოთ ბავშვების თანდასწრებით, თუ რამე შეგეშალათ, ბოდიშის მოხდა ადამიანის დიდი ღირსებაა

არ იჩხუბოთ ბავშვების თანდასწრებით, თუ რამე შეგეშალათ, ბოდიშის მოხდა ადამიანის დიდი ღირსებაა - ილია მეორე მშობლებს

საზოგადოება - 17:45, 17 May, 2017

46374

ოჯახის სიწმინდის დაცვის დღესთან დაკავშირებით საქართველოს კათოლიკოს-პატრიარქმა დღეს სამებაში იქადაგა. ტაძარში შეკრებილებს ჟურნალი ” ბედნიერ ოჯახი” დაურიგეს, რომელიც დღევანდელ დღესთან დაკავშირებით გამოიცა. ჟურნალს ილია მეორის წინასიტყვაობა ახლავს თან, რომელიც საზოგადოებას მეუფე დანიელმა წაუკითხა. უწმინდესის სიტყვებში ყურადღება ოჯახურ სიმშვიდეზეა გამახვილებული. ილია მეორე მოუწოდებს მეუღლეებს, რომ თავი შეიკავონ შვილების თანდასრებით ჩხუბისგან, რადგან ეს ბავშვებზე მტკივნეულად აისახება.

,,ოჯახშიც და ოჯახისგან დამოუკიდებლადაც ცოლსაც და ქმარსაც შეიძლება ბევრი უსიამოვნება შეხვდეს. ყოველთვის ეცადეთ, გაუგოთ ერთმანეთს. იყავი მეუღლის თანამგრძნობი, მაგრამ თუ იგი ცრუობს, ისე წარმართე საუბარი, რომ სიმართლეც უთხრა და თან მისი ღირსება არ შელახო. არასოდეს დაამცირო იგი შვილების და ან სხვათა წინაშე, რომ თქვენც ერთმანეთთან მიმართებაში არ დაარღვიოთ გარკვეული ზღვარი და შვილებსაც პატივისცემა არ დაუკარგოთ. თქვენც გაითავისეთ და შვილებსაც ასწავლეთ, რომ თუ რამე შეგეშალათ, ბოდიშის მოხდა და დანაშაულის აღიარება ადამიანის დიდი ღირსებაა. არ შეუშინდეთ პრობლემებს, პირიქით, იგი თქვენი დაახლოებისა და სულიერ კიბეზე ამაღლების საშუალებად აქციეთ და ღმერთიც აუცილებლად შეგეწევათ. არ იჩხუბოთ, მით უმეტეს, ბავშვების თანდასწრებით, ეს შვილებზე მეტად მტკივნეულად მოქმედებს. თუ უსიამოვნება მაინც მოგივათ, ეცადეთ, დაძინებამდე შერიგდეთ. წმინდა მამები გვარიგებენ, რომ მზე ისე არ უნდა ჩავიდეს, რომ შენს მიერ განაწყენებულ ახლობელთან ურთიერთობა არ აღადინოო. მით უმეტეს - მეუღლესთან“ - ნათქვამია პატრიარქის წინასიტყვაობაში.