17 მაისი და აქციები თბილისში - პოლიციამ კანცელარიასთან მისასვლელი ყველა გზა ჩაკეტა

საზოგადოება - 09:54, 17 May, 2017

14640

მთავრობის ადმინისტრაციასთან სამართალდამცავების მობილიზება შეინიშნება. ცოტა ხნის წინ პოლიციამ უწყებამდე მისასვლელი ყველა გზა გადაკეტა.
დილიდან დაკეტილია ინგოროყვას ქუჩა ორივე მხრიდან, ასევე მეტროსადგურ ”თავისუფლების მოედნიდან” მისასვლელი გზა.

მთავრობის ადმინისტრაციასთან დღეს, 10:00 საათზე ჰომოფობიასთან და ტრანსფობიასთან ბრძოლის საერთაშორისო დღესთან დაკავშირებით საპროტესტო აქცია გაიმართება.

შინაგან საქმეთა სამინისტროს 17 მაისს თბილისში დაგეგმილი აქციებთან დაკავშირებით განცხადებაც გაავრცელა. უწყების ცნობით, საზოგადოებრივი წესრიგისა და უსაფრთხოების დაცვის მიზნით, რამდენიმე ქუჩაზე მოძრაობა აიკრძალება.

„შინაგან საქმეთა სამინისტრო გაცნობებთ, რომ მიმდინარე წლის 17 მაისს თბილისში დაგეგმილ აქციებთან დაკავშირებით, საზოგადოებრივი წესრიგისა და
უსაფრთხოების დაცვის მიზნით, რამდენიმე ქუჩაზე მოძრაობა აიკრძალება. 16 მაისს, 21:00 საათიდან გადაიკეტება ვარდების მოედანი. 17 მაისს, 09:30 საათიდან ყველა სახის სატრანსპორტო საშუალებისთვის მოძრაობა აიკრძალება - თავისუფლების მოედანზე, ასევე, რუსთაველის გამზირზე და ყველა მის მკვეთ ქუჩაზე. ავტომანქანები შემოვლითი გზით, რევაზ თაბუკაშვილის ქუჩის გავლით, მარჯვენა
სანაპიროზე იმოძრავებენ. სატრანსპორტო მოძრაობა აქციების დასრულებისთანავე აღდგება“, - აცხადებს შსს.

ცნობისთვის, 17 მაისს ჰომოფობიასა და ტრანსფობიასთან ბრძოლის საერთაშორისო დღე აღინიშნება. 2014 წელს კი საქართველოს პატრიარქმა, ილია მეორემ 17 მაისი ოჯახის სიმტკიცისა და სიწმინდის დღედ გამოაცხადა. დღეს დილიდან საქართველოს საპტრიარქოსა და „დავითიანნის“ ორგანიზებით თბილისის სხვადასხვა ლოკაციაზე აქცია - მსვლელობა იმართება.