სოფელ ზედა ეწერში უკიდურესად გაჭირვებულ გერგედავების ოჯახს სოციალური დახმარება მოუხსნეს. როგორც გერგედავების ოჯახის უფროსი აცხადებს, დახმარება მას შემდეგ მოუხსნეს, რაც ელექტროენერგიის გადასახადის ქვითარზე 25 ლარის გადახდა დაფიქსირდა. როგორც ოჯახის უფროსს შესაბამის სამსახურში განუმარტეს, ეს თანხა აღემატება სოციალურად დაუცველთა შესაძლებლობებს.

გერგედავების ოჯახმა განაცხადი კიდევ ერთხელ შეავსო სოციალური დახმარების შესახებ, თუმცა მოგვიანებით მათ მაღალი ქულები დაუწერეს, რის გამოც დახმარების აღდგენა არ მოხდა და განუმარტეს, რომ მომდევნო განაცხადის შევსება მხოლოდ ერთი წლის შემდეგ შეეძლებათ.

„ნიუპოსტის“ ადგილობრივი კორესპონდენტის ცნობით, ოჯახში ცხოვრობს 20 წლის გოგო, რომელსაც ფსიქიური პრობლემები აქვს, ოჯახში ასევე ცხოვრობს 82 წლის უსინათლო მოხუცი, ოჯახს არ აქვს საშუალება ელემენტარული საცხოვრებელი პირობები შეიქმნას, მათ შორის აქვთ პრობლემები საკვებთან დაკავშირებითაც.

რაც შეეხება საცხოვრებელ სახლს, იგი ავარიულია და საცხოვრებლად უვარგისი. გერგედავების ოჯახი დახმარებას ითხოვს.