ქირურგიის ეროვნულ ცენტრში სისხლის ბანკი გაიხსნა

საზოგადოება - 16:53, 15 May, 2017

2406

ქირურგიის ეროვნულ ცენტრს 15 მაისს შეემატა ახალი სამედიცინო სერვისი.

დღეს საზეიმო ვითარებაში გაიხსნა სისხლის ბანკი, რომელსაც უცხოელი კოლეგები ესწრებოდნენ. სისხლის ბანკი ქირურგიის ეროვნული ცენტრისთვის სტრატეგიულ ობიექტს წარმოადგენს. ავსტრიელი სტუმრებისთვის პრეზენტაცია წარმოადგინა ქირურგიის ეროვნული ცენტრის კლინიკურმა დირექტორმა, ნიკოლოზ ჩადუნელმა.

სისხლის ბანკის ფუნქციებში შედის დონორული სისხლის მიღება, გადამუშავება, სკრინინგული (ჰეპატიტი, B, C, AIV ინფექცია, სიფილისი) და კლინიკური (სისხლის საერთო, ჯგუფი, რეზუს კუთვნილება, ფენოტიპირება და KeLL ფაქტორი) კვლევა, შემდგომ კი სისხლის კომპონენტებით კლინიკის უზრუნველყოფა. სისხლის ბანკში დასაქმებული იქნება 3–5 ადამიანი, რომელიც სრულად უზრუნველყოფს სამსახურის უწყვეტ და სრულფასოვან ფუნქციონირებას.

ქირურგიის ეროვნულმა ცენტრმა შეიძინა „ფრეზენიუსის“ წარმოების სისხლის სეპარირების აპარატი სახელწოდებით „ამიკუსი“. ეს არის მაღალტექნოლოგიური თანამედროვე მოწყობილობა, რომელიც საშუალებას იძლევა უწყვეტი მეთოდით მივიღოთ და მოვახდინოთ დონორის სისხლის სეპარირება, ანუ დანაწევრება და კომპონენტებად გამოყოფა, კერძოდ შესაძლებელია დამზადდეს:

სისხლის ერითროციტები.

თრომბოკონცენტრატი.

პლაზმა.

ასევე შესაძლებელია დამზადდეს სხვა კომპონენტებისგან შემდგარი სისხლის პრეპარატები.

მნიშვნელოვანია ის ფაქტი, რომ შესაძლებელია სისხლის ღეროვანი უჯრედების დამზადება, რაც საშუალებას გვაძლევს უახლოეს მომავალში კლინიკაში განვითარდეს ღეროვანი უჯრედების ტრანსპლანტაციის სერვისი.

ამ აპარატის საშუალებით აგრეთვე შესაძლებელია ჩატარდეს პლაზმოფერეზი თერაპიული მიზნებისთვის.