დედაქალაქი მეცნიერების ფესტივალს უმასპინძლებს

საზოგადოება - 13:11, 10 May, 2017

1147

შაბათს, 16:00 საათზე, ისთ ფოინთში, მეცნიერების ფესტივალი „შეეხე მეცნიერებას“ გაიხსნება. პროექტში წელს 100-ზე მეტი ახალგაზრდა იქნება ჩართული. ნორჩი მეცნიერები და წარმატებული მოსწავლეები დამთვალიერებლებს სხვადასხვა ტიპის აქტივობებსა და სამეცნიერო პროექტებს გააცნობენ.

ინოვაციური ფესტივალის ძირითადი პროგრამა 16:00 საათზე დაიწყება, რომლის განმავლობაშიც სხვადასხვა ექსპერიმენტები ჩატარდება. ღონისძიების ფარგლებში ასევე დაგეგმილია ბოლო პერიოდის განმავლობაში კონკურსებში გამარჯვებული გამომგონებლების ნამუშევრების გამოფენაც.

ფესტივალის განმავლობაში სტუმრებს საშუალება ექნებათ დაათვალიერონ სხვადასხვა გამოგონებები და თავად ჩაერთონ ინოვაციურ ექსპერიმენტებში. მეცნიერების ფესტივალში დემირელის სახელობის კოლეჯისა და თბილისის სხვა სკოლის მოსწავლეები, ახალგაზრდა მეცნიერები და შშმ გამომგონებლებიც მიიღებენ მონაწილეობას.

წლევანდელ გამოფენაზე ექსპერიმენტები სხვადასხვა საბუნებისმეტყველო მეცნიერებებში იქნება წარმოდგენილი. ჯამში დამთავლიერებელი 50-ზე მეტ საინტერესო ექსპერმენტსა და 20-მდე ინოვაციურ გამოგონებას იხილავს.

ფესტივალის მიზანია კიდევ უფრო შეაყვაროს მოსწავლეებს საბუნებისმეტყველო საგნები, დაანახოს მეცნიერებების მნიშვნელობა და როლი განათლების მიღების პროცესში.

პროექტი „შეეხე მეცნიერებას“ წელს დემირელის სახელობის კოლეჯის ინიციატივით იმართება და მასში დედაქალაქის სხვადასხვა სკოლაც მონაწილეობს. მეცნიერების ფესტივალში 2016 წლის ნორჩ მეცნიერთა და გამომგონებელთა საერთაშორისო ფესტივალის გამარჯვებული გამომგონებლებიც არიან ჩართულნი, რომლებიც დამთვალიერებლებს საკუთარ პროექტებს გააცნობენ და მისცემენ რჩევებს ამ თემით დაინტერესებულ მოსწავლეებს.