„საქნახშირის“ დირექტორი ჯამბულ ჯაყელი აცხადებს, რომ ტყიბულში, მინდელის სახელობის შახტაში უბედური შემთხვევის სავარაუდო მსხვერპლისა და დაშავებულების შესახებ ინფორმაციას არ ფლობს.

როგორც საზოგადოებრივს ჯაყელმა განუცხადა, უბედური შემთხვევა მაშინ მოხდა, როცა ბაგირის გეგმური სარემონტო სამუშაოები მიმდინარეობდა.

„ავარია მოხდა, ჭაურს არემონტებდნენ, ბაგირის რემონტს აკეთებდნენ, ე.წ. კოსტა ჩავარდა და მუშებიც იქვე იდგნენ. ოთხი ადამიანია ჩავარდნილი. დაღუპულებზე ინფორმაცია არ გვაქვს. ყველა აქ ვართ, დეტალებს ვადგენთ“, - განაცხადა ჯაყელმა.

ჯაყელის მსგავსად, დაღუპულთა და დაშავებულთა შესახებ ინფორმაციას არ ფლობს ტყიბულის მაჟორიტარი დეპუტატი ელგუჯა გოცირიძე.

საზოგადოებრივთან საუბარში გოცირიძე აცხადებს, რომ ჯერჯერობით ინფორმაციას აზუსტებს.

„ინფორმაცია ცოტა ხნის წინ გავიგე და ახლა ტყიბულისკენ მივდივარ. პირველადი ინფორმაციით, მითხრეს, რომ ვიღაც დაღუპულია. ზუსტად არავინ იცის, მაგრამ ამბობენ, რომ ნახშირი რითაც ამოაქვთ, ბაგირს ცვლიდნენ, გეგმური რემონტი იყო და ის ჩავარდნილა“, - განაცხადა გოცირიძემ.

მინდელის შახტა, სადაც უბედური შემთხვევა მოხდა, კომპანია „საქნახშირს“ ეკუთვნის.

წყარო 1tv.ge