,,ნაცემი არის, მაგრამ როგორც შევატყვე ბავშვი დაშინებულია“ - მოზარდის მშობლები ცხენის ქურდობის ფაქტს უარყოფენ

კრიმინალი - 12:03, 30 Apr, 2017

15415

საგარეჯოში, ცხენების ქურდობის ბრალდებით დაკავებული 15 წლის მოზარდის, იოსებ გიგაურის ოჯახი ქურდობის ბრალდებას უსაფუძვლოს უწოდებს. როგორც დაკავებულის დამ, ლია გიგაურმა განაცხადა, მის ძმას ხელფასი არ გადაუხადეს, ამიტომ ტრანსპორტის არქონის გამო ფერმა ცხენით დატოვა. ასევე, მოზარდის მამის განცხადებით, მის შვილს ცემის კვალი აღენიშნება.

იოსებ გიგაურის მშობლები ასევე აპროტესტებდნენ იმ ფაქტს, რომ საგარეჯოს პოლიციაში არასრულწლოვანი იოსებ გიგაურის დაკითხვა მშობლების გარეშე მიმდინარეობდა. პოლიცია თავიდან განმარტავდა, რომ დაკითხვას სოციალური მუშაკი ესწრებოდა. რამდენიმე წუთის წინ, პოლიციამ შვილის სანახავად მოზარდის დედა შეუშვა.

ასევე დაიკითხა ფერმის მფლობელი, სადაც მოზარდი მშობლების დაუკითხავად მუშაობდა.

„ნაცემი არის, მაგრამ, როგორც მე შევატყვე, ბავშვი დაშინებულია და ახლა იმას ამბობს, რომ ვითომ ცხენიდან გადმოვარდა,“ - აცხადებს ბავშვის დედა.

იოსების მამა, ოთარ გიგაური აცხადებს, რომ მისი შვილის დამსაქმებლის მხრიდან ფიზიკური და ფსიქოლოგიური ძალადობის მსხვერპლი იყო.

„პოლიციამაც ჰკითხა, ვინ გცემაო და მან უპასუხა, არავინ, უბრალოდ ცხენიდან გადმოვვარდიო, მაგრამ თვალით ცხენიდან გადმოვარდნილი ვერ დაეცემა,“ - აცხადებს ოთარ გიგაური.