პანკისის ხეობის სოფელ ჯოყოლოში მშენებარე ქრისტიანული სალოცავის დანგრევის ფაქტი ალავერდის ეპარქიის მრევლმა გააპროტესტა, ადგილზე იყო ჩასული ალავერდის მიტროპოლიტი დავითიც. მისი თქმით აღნიშნული ქმედება ხალხის დასაპირისპირებლად მიმართული პროვოკაციია, თუმცა მისი თქმით „ხალხი ბრძენია და ყველაფერს ხვდება"

გავრცელებული ინფორმაციით პანკისის ხეობის სოფელ ჯოყოლოში ადგილობრივ მოსახლეს მაყვალა ცისკარიშვილს, რომელიც სალოცავის აღდგენას ცდილობდა, აღდგომის მეორე დღეს ის დანგრეული დახვდა. ვინ და რა მიზეზით დაანგრია მშენებარე სალოცავი უცნობია. რამდენიმე ადგილობრივის განცხადებით მსგავს მცდელობებს ადრეც ქონდა ადგილი და ცისკარიშვილის მიმართ იყო მუქარებიც, თუმცა ამ ფაქტს არ ადასსტურებს თავად მაყვალა ცისკარიშვილი და აღნიშნავს, რომ არანაირი ზეწოლა და მუქარა არ ყოფილა. ქრისტიანი და მუსლიმი მოსახლეობის დაპირისპირებისკენ მიმართულ პროვოკაციად აფასებს აღნიშნულ ფაქტს ადგილობრივი ქისტი მოსახლეობაც. მათი თქმით უპასუხისმგებლო ადამიანებმა ეს პროვოკაციის მიზნით გააკეთეს, ვიღაცეებს რომ გადააბრალონ.

შსს-ს განცხადებით მომხდარზე გამოძიება სისხლის სამართლის კოდექსის 187-ე მუხლით მიმდინარეობს, რაც ნივთის დაზიანებას ან განადგურებას გულისხმობს.