ე.წ. მოსმენების კანონი - მოქალაქეების სარჩელების მიღება დასრულდა

საზოგადოება - 18:58, 06 Apr, 2017

1530

ე.წ. მოსმენების კანონზე მოქალაქეების სარჩელების მიღება დასრულებულია. კამპანია ეს შენ გეხება საჩივრებს თბილისში ქუთაისსა და ბათუმში აგროვებდა. ამ დროისთვის სულ 300-მდე მოქალაქე შეუერთდა კანონის საკონსტიტუციო სასამართლოში გასაჩივრების ინიციატივას.

საქართველოს ახალგაზრდა იურისტთა ასოციაციის თავმჯდომარე აცხადებს, რომ სახელმწიფომ უნდა გაიგოს მოქალაქეების აზრი.

“მიზანი არის სახელმწიფოს გააგონოს პირველ რიგში, მოქალაქეების ხმა და შემდეგ უკვე საკონსტიტუციო სასამართლოს მეშვეობით შევეცადოთ, რომ დაბრუნდეს პროცესი კონსტიტუციურ სივრცეში იმიტომ, რომ სამწუხაროდ, კანონი, რომელიც ცვლილებებამდე მოქმედებდა, იყო არაკონსტიტუციური, მაგრამ ის ცვლილებებიც, რომელიც პარლამენტმა მიიღო, არ არის შესაბამისობაში საკონსტიტუციო სასამართლოს გადაწყვეტილებასთან და თავად კონსტიტუციასთან“ - განაცხადა ნაცვლიშვილმა.

ადამიანის უფლებების სწავლებისა და მონიტორინგის ცენტრის ინსტიტუციური რეფორმების პროგრამის დირექტორის სოფო ვერძეული კი ამბობს:

“კამპანიის პოზიცია არის ის, რომ დღეს არსებული კანონმდებლობა კიდევ უფრო ამძიმებს სამართლებრივ მდგომარეობას და ჩვენ ვფიქრობთ, მოსმენების სფეროში არა თუ არ გაუმჯობესებულა მდგომარეობა, არამედ, კიდევ უფრო პრობლემები შექმნა".