სისხლიანი ანგარიშსწორება თბილისის ცენტრში - დაჭრილის მდგომარეობა მძიმეა

კრიმინალი - 12:07, 06 Apr, 2017

31947

იოსებიძის ქუჩაზე დაჭრილი ახალგაზრდა მამაკაცს რესპუბლიკურ საავადმყოფოში ორი ოპერაცია ჩაუტარდა. როგორც „ნიუპოსტს“ რესპუბლიკურ საავადმყოფოში განუცხადეს, პაციენტი რეანიმაციულ განყოფილებაში მართვით სუნთქვაზე იმყოფება. მდგომარეობა კვლავ მძიმეა.

„პაციენტი კლინიკაში, სასწრაფო დახმარების ბრიგადის მიერ იქნა მოყვანილი. აღენიშნებოდა მრავლობითი ცეცხლნასროლი ჭრილობები. სასიცოცხლო ჩვენებით ჩაუტარდა ოპერაციული ჩარევა. მდგომარეობა მძიმეა“- აცხადებს ქირურგი ნიკა კვაჭაძე.

რაც შეეხება უშუალოდ განზრახ მკვლელობის მცდელობას, როგორც „ნიუპოსტს“ შინაგან საქმეთა სამინისტროში განუცხადეს, მომხდარზე გამოძიება სისხლის სამართლის კოდექსის 19-108-ე მუხლით მიმდინარეობს, რაც განზრახ მკვლელობის მცდელობას გულისხმობს.

ამ დროისთვის არსებული ინფორმაციით, პოლიციას ბრალდებული ან ბრალდებულები არ დაუკავებია.

უცნობია სისხლიანი გარჩევის მოტივიც. როგორც იოსებიძის 69 ნომერში მცხოვრებლები აცხადებენ, გასროლამდე მათ ახალგაზრდებს შორის ჩხუბის ხმა გაიგეს.

ადგილზე მისულმა ექსპერტ-კრიმინალისტებმა ტყვიის მასრები ამოიღეს, რომელსაც ექსპერტიზა ჩაუტარდება.

„ღამის ორ საათზე დაახლოებით ოთხი გასროლის ხმა გავიგეთ. ხმაურზე გამოსულს მომესმა, როგორ ყვიროდნენ დაჭრესო“ -აღნიშნავს ერთ-ერთი ადგილობრივი.