სადაზღვეო კომპანია „იმედი L”-ის მიერ შეცდომაში შეყვანილი მომხმარებელი და დაბნეული პაციენტი

საზოგადოება - 15:06, 05 Apr, 2017

8385

სადაზღვეო კომპანია „იმედი L”-მა მისი მომხმარებელი ა.თ. შეცდომაში შეიყვანა.

როგორც „აქცენტთან“ საუბრისას ა.თ. აცხადებს, მან სადაზღვეო კომპანიას დაახლოებით ერთი თვის წინ მიმართა.

„გლანდების ოპერაცია მესაჭიროებოდა. მივედი ჩემს დამზღვევ კომპანიაში და მივიტანე კალკულაცია. კომპანიიდან მოგვიანებით დამიკავშირდნენ და მაცნობეს, რომ ჩემი ოპერაცია 90%-ით დაფინანსდებოდა, შესაბამისად, თავად საერთო ხარჯის მხოლოდ 10%–ზე უნდა მეზრუნა. ამის შემდეგ დაინიშნა ოპერაცია. ოპერაციის დღეს კლინიკაში გამოვცხადდი, სადაც ჩემი ოპერაციისთვის სრული მზადყოფნა იყო, მაგრამ უკვე კლინიკაში თანხის გადახდის სულ სხვა ვერსია დამახვედრეს. კერძოდ, მითხრეს, რომ 800 ლარიდან ისინი მხოლოდ 300 ლარს დამიფინანსებდენ. სიტუაციის გარკვევას თავად სადაზღვეო კომპანიაში შევეცადე. ამ ჯერზე კი მითხრეს, რომ მსგავს ოპერაციებს 90%-ით არ აფინანსებენ. ძალიან უხერხულ მდგომარეობაში აღმოვჩნდი. კლინიკა ოპერაციისთვის მზად იყო, მე კი დამატებითი თანხის მოძიება დამჭირდა, რადგან მსგავსი სიურპრიზისთვის მზად არ ვიყავი. არ მესმის, რატომ თავიდანვე საქმის კურსში არ ჩამაყენეს“ ,– უყვება „აქცენტს“ ა.თ.

„აქცენტი“ ინფორმაციის გადასამოწმებლად „იმედი L”-ს დაუკავშირდა. კომპანიაში სატელეფონო ზარებს საზოგადოებასთან ურთიერთობის სამსახურში არ პასუხობენ.

მათ „ფეიქბუქის“ ოფიციალური გვერდის მეშვეობით მოგვწერეს, თუმცა აღნიშნეს, რომ მათ მიერ მოწერილი ინფორმაცია კომენტარად არ გამოგვეყენებინა.

წყარო: "აქცენტი"