საქართველოს ჭიდაობის ეროვნული ფედერაცია უარყოფს გავრცელებულ ინმფორმაციას, იმის შესახებ, რომ 23 წლამდე ასაკი მოჭიდავეთა ნაკრები მსოფლიო ჩემპიონატისთვის მომზადებას რუსეთის მიერ ოკუპირებული ყირიმის ტერიტორიაზე გაივლის.

როგორც "ნიუპოსტს" ფედრეაციიდან აცნობეს, ჭიდაობის ფედერაციის პრეზიდენტმა გეგა გეგეშიძემ თემის კომენტირებისას მექანიკური შეცდომა დაუშვა.

„საზოგადოებრივი ინტერესიდან გამომდინარე, ჭიდაობის ეროვნული ფედერაცია განმარტავს, რომ მსოფლიო ჩემპიონატისთვის საქართველოს ნაკრები მომზადებას ალუშტას ბაზაზე არ გადის. ეს იყო მექანიკური შეცდომა, რომელიც საუბრისას იქნა დაშვებული. ეროვნული ნაკრების ნაწილი ბორჯომში იმყოფება, ნაწილი კი, საქართველოს ფარგლებს გარეთ.

ბერნულ-რომაული სტილით მოჭიდავეთა უფროსი ასაკის ნაკრები რამდენიმე დღეა უკვე ევროპის ჩემპიონატისთვის, ადლერში შეკრებაზე იმყოფება, ხოლო დღეს, გუნდს 23-მდე ასაკის წევრებიც შეუერთდებიან, რომლებიც მსოფლიო ჩემპიონატისთვის დაიწყებენ მზადებას.

თავისუფალი და ბერძნულ-რომაული სტილით მოჭიდავეთა ნაკრებმა უკვე გაიარა მზადება სომხეთის ქალაქ წახკაძორში. კარგად დაგეგმილი სასწავლო-საწვრთნელი პროცესების ერთობლიობამ შესაბამისი შედეგი გამოიღო და მოჭიდავეებმა ჩვენს ქვეყანას ევროპის ჩემპიონატზე გუნდური პირველი ადგილი და 11 მედალი მოუტანეს“, - აღნიშნულია განცხადებაში.

როგორც თბილისის საერთაშორისო აეროპორტში საქართველოს ჭიდაობის ფედერაციის პრეზიდენტმა გეგა გეგეშიძემ ,,კურიერთან“ განაცხადა, მსოფლიო ჩემპიონატისთვის საქართველოს ნაკრები მომზადებას ალუშტას ბაზაზე გაივლის.

ჭიდაობის ფედერაცია ადლერში გადაღებულ ფოტოებსაც აქვეყნებს.