"ცენტრ პოინტის" საქმე - დაზარალებულები რჩეულიშვილების ქონების დაყადაღებას ითხოვენ

საზოგადოება - 15:59, 31 Mar, 2017

3022

ე.წ ცენტრ პოინტის საქმეზე მოსამართლის გადაწყვეტილებას, რომლის მიხედვითაც კომპანიის დამფუძვნებლებს პატიმრობა შეეფარდათ, დაზარალებულები აპროტესტებენ.
მათ მოლოდინი ჰქონდათ, რომ სასჯელი ბევრად მკაცრი იქნებოდა და მიყენებული ზარალი ანაზღაურდებიდა. ამ მოთხოვნით, დაზარალებულებმა საქართველოს მთავარ პროკურატურასთან აქცია გამართეს.

„აუცილებლად მოვითხოვთ ყველა ობიექტის დაყადაღებას. სახელმწიფო ჩადგეს შუამავლად, შემოიყვანოს რეალური ინვესტორები და არა თაღლითების მოგონილი ინვესტორები. ჩვენ არ გავჩერდებით, არავითარ შემთხვევაში არ შევეგუებით ამ თაღლითობას და გავაპროტესტებთ,“-აცხადებენ დაზარალებულები.

დაზარალებულების მოთხოვნებს მთავარ პროკურატურაში უპასუხეს.

საქმის პროკურორი დავით გუმბერიძე ამბობს, რომ ინვესტორის და მშენებლობის დასრულების საკითხს ბრალდების მხარე ვერ უზრუნველყოფს.

მისი თქმით, დაზარალებულებმა ინდივიდუალურად უნდა მიმართონ სასამართლოს და ამ ფორმით უნდა მოითხოვონ ზარალის ანაზღაურება. პროკურორები დღეს მენაშენეებს შეხვდნენ.

„ჩვენ მათ მივაწოდეთ ინფორმაცია განაჩენთან დაკავშირებით, რაც შეეხება ლეგალიზაციის ეპიზოდს, დაველოდებით სასამართლოს მიერ გადაცემულ განაჩენს და ამის შემდეგ ვიმსჯელებთ გასაჩივრების ნაწილზე. თითოეული მათგანი ითხოვს ზიანის ანაზღაურებას სრულად, ეს იქნება როგორც მატერიალური ზიანი, ასევე მორალური. ამ კუთხით ჩვენ ვაწვდით ინფორმაციას, რომ სამოქალაქო დონეზე მათ შეუძლიათ მიიღონ ეს განაჩენი იგივე საქალაქო სასამართლოს გადაწყვეტილებით. რაც შეეხება ინვესტორის საკითხს, მშენებლობის დასრულებას, ბრალდების მხარე ამას პასუხს ვერ გავცემთ,“ - განაცხადა დავით გუმბერიძემ.