თსუ-ში ინგლისური ენის მართლწერის ნაციონალური კონკურსის NESC-GE საფინალო რაუნდი გაიმართა

საზოგადოება - 18:56, 28 Mar, 2017

1626

ივ.ჯავახიშვილის სახელობის თბილისის სახელმწიფო უნივერსიტეტის მთავარ სააქტო დარბაზში, ინგლისური ენის ცოდნაში მიღწეული წარმატებისთვის, ჩემპიონის ტიტულის მოსაპოვებელად, გაიმართა ინგლისური ენის მართლწერის ნაციონალური კონკურსის NESC-GE საფინალო რაუნდი, რომელშიც 48 ფინალისტმა მიიღო მონაწილეობა.

ინგლისურის ენის მართლწერის ნაციონალური კონკურსი NESC-GE არის, ამერიკული პროექტის Spelling BEE - ს ანალოგი. საქართველოში კონკურსის შექმნის იდეა ეკუთვნის ამერიკის სახელმწიფო დეპარტამენტი მშვიდობის კორპუსის მოხალისეს ადამ მალინოვსკის და გას დევიდსონს. ხოლო, კონკურსი პირველად განხორციელა ამერიკის მეგობართა კლუბის პრეზიდენტმა ილია ზუკაკიშვილმა, რომელმაც 2012-2013 წელს ქართული და საერთაშორისო ორგანიზაციების აქტიური მხარდაჭერით განავითარა პროქტი და ქვეყანაში ინგლისური ენის პოპულარიზაციის მიზნით განახორციელა პირველი რეგიონალური შეჯიბრი.

ინგლისურის ენის მართლწერის ნაციონალური კონკურსში მონაწილეობისთვის, მოსწავლეები მთელი წლის მანძილზე, თავიანთ პედაგოგებთან ერთად, ძალ-ღონეს არ იშურებენ იმისთვის, რომ მომზადებულნი წარდგნენ ფართო აუდიტორიის წინაშე და გაუმკლავდნენ რთული ინგლისური სიტყვების მართლწერას, პირველ ეტაპზე წერილობით, შემდეგ კი ზეპირსიტყვიერად, რაც ერთის მხრივ, გულშემატკივრებისთვისაც სანახაობრივი და აზარტულია, რომ აღარაფერი ვთქვათ იმ განცდებზე, რასაც სცენაზე მდგომი მონაწილეები განიცდიან, მეორეს მხრივ კი ეს პროექტი შესანიშნავი შესაძლებლობაა კულტურული გაცვლის თვალსაზრისითაც- ბავშვებს საქართველოს სხვადასხვა კუთხიდან საშუალება აქვთ შეხვდნენ თანატოლებს, დაუმეგობრდნენ ერთმანეთს და ერთად გაატარონ საინტერესო აქტივობებით და ღონისძიებებით დატვირთული შაბათ-კვირა. აქვე აღსანიშნავია ისიც, რომ მონაწილეები პროექტის ფარგლებში ხვდებიან სხვადასხვა საპატიო ქართველ და არაქართველ სტუმარს, მათთან შეხვედრა და მათი გამოცდილების მოსმენა კი გარკვეულწილად შთაგონებისა და მოტივაციის წყაროდაც იქცევა ხოლმე. კონკურსი სამი ეტაპისგან შედგება და მასში საქართველოს მაშტაბით მონაწილეობას იღებენ მე-8 - მე-12 კლასის მოსწავლეები, რომლებიც ერთმანეთს ეჯიბრებიან რთული ინგლისური სიტყვების დამარცვლაში. აღნიშნული პროექტი უნიკალურ შესაძლებლობებს აძლევს ბავშვებს და მათ მასწავლებლებს გაიუმჯობესონ ინგლისური ენის უნარები, წარმოაჩინონ თავიანთი სკოლა და გახდნენ ეროვნული კონკურსის მონაწილეები. კონკურსი NESC-GE წელს უკვე მეხუთედ ჩატარდა საქართველოში და ყოველწლიურად უფრო და უფრო მეტ ბავშვს აძლევს საშუალებას მონაწილეობა მიიღოს ადგილობრივ, რეგიონალურ და საფინალო რაუნდზე. პროექტის ოფიციალური მხარდამჭერია: აშშ-ის საელჩო, საქართველოს განათლებისა და მეცნიერების სამინისტრო, აშშ-ის მშვიდობის კორპუსი, ივ.ჯავახიშვილის სახელობის თბილისის სახელმწიფო უნივერსიტეტი, ამერიკის მეგობართა კლუბი, ბრიტანეთის საბჭო საქართველოში, ინგლისურენოვანი გაზეთი “The Messenger“