"ბინებს ყიდიან" - ზუგდიდში დევნილებისთვის ბინების გადაცემა საპროტესტო აქციის ფონზე მიმდინარეობს

საზოგადოება - 11:00, 27 Mar, 2017

3243

ზუგდიდში, ბარამიას ქუჩაზე იძულებით გადაადგილებული პირებისთვის ბინების გადაცემა ხმაურის ფონზე მიმდინარეობს.

შენობის ეზოში ის დევნილები შეიკრიბნენ, რომლებმაც საცხოვრებელი ფართი ვერ მიიღეს.
აქციაზე ერთ-ერთი დევნილი ჟანა ცაცუა შეუძლოდ გახდა.

ცაცუა აცხადებს, რომ აქვს სიმსივნე და რთული ჯანმრთლობის მდგომარეობა, თუმცა ბინების განაწილებისას ეს ფაქტორები არავის გაუთვალისწინებია. დევნილი ადგილობივ სამმართველოს ბინების გაყიდვაში ადანაშაულებს.

"ბინებს ყიდიან. არ უნდა მიეცათ დაბალქულიანი დევნილებისათვის, თუმცა, 6 და 7 ქულიან ოჯახებსაც მისცეს. მეოთხე სტადიის სიმსივნე მაქვს და გაუსაძლის პირობებში ვცხოვრობ, თუმცა ჩემი გაჭირვება არავის აინტერესებს“ - განაცხადა მან.

საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტრო ზუგდიდში, ბარამიას ქუჩაზე, 2 თორმეტსართულიან კორპუსში 144 დევნილ ოჯახს საცხოვრებელი ფართი გადასცა.

ბინის გასაღები დევნილებს ლტოლვილთა მინისტრის პირველმა მოადგილემ გრიგოლ გიორგაძემ და მინისტრის მოადგილემ გოგი ფაცაციამ პირადად გადასცეს.