დღეს საკონსტიტუციო სასამართლოში არსებითი განხილვა გაიმართება საერთო სასამართლოებში საქმეებზე მიღებული გადაწყვეტილებების საჯაროობის მოთხოვნით შეტანილ სარჩელზე. სარჩელი ორმა არასამთავრობო ორგანიზაციამ წარადგინა.

მოსარჩელეები მოითხოვენ, რომ პერსონალურ მონაცემთა დაცვის შესახებ კანონის და ზოგადი ადმინისტრაციული კოდექსის ის მუხლები, რომელიც სასამართლოს გადაწყვეტილებების ხელმისაწვდომობას ეხება, არაკონსტიტუციურად ცნონ.

„არსებული საკანონმდებლო ჩარჩოს პირობებში შეუძლებელია მივიღოთ სასამართლო გადაწყვეტილებები სხვადასხვა გახმაურებულ საქმეზე, რომელთა მიმართაც არსებობს განსაკუთრებით მაღალი საჯარო ინტერესი. ასეთი საქმეებია მიხეილ სააკაშვილის მიმართ მიმდინარე საქმე, თბილისის ყოფილი მერის წინააღმდეგ მიმდინარე საქმე. ბუნებრივია, რომ ამას გავლენა ექნება ყველა სასამართლო გადაწყვეტილებაზე, მათ შორის რუსთავი 2-ის საქმეზე მიღებულ გადაწყვეტილებაზეც. ჩვენ რომ მივმართოთ სასამართლოს და მოვითხოვოთ გადაწყვეტილება მოცემულ საქმეზე, ის უარს იტყვის აღნიშნული გადაწყვეტილების გაცემაზე, პერსონალურ მონაცემთა დაცვის არგუმენტით,“ - განაცხადა IDFI-ის იურისტმა ნონო მერებაშვილმა.