ნარკოტიკული საშუალებების ჩადებით მოქალაქეების დაკავებებს გააპროტესტებენ დღეს აქციით. „არა ჩადებას“ - ამ მოწოდებით აქციის მონაწილეები ორთაჭალაში, შინაგან საქმეთა სამინისტროსთან შეიკრიბებიან და პროტესტის ნიშნად ჯიბეებს ამოიკერავენ.

პროტესტის ნიშნად აქციაზე მისვლას გეგმავს საქართველოს პრეზიდენტის შვილი ანა მარგველაშვილი, სამოქალაქო სექტორის წარმომადგენლების განცხადებით, ამ მიმართულებით მსგავსი სამოქალაქო აქტივობა გაგრძელდება. უმრავლესობის რიგებში კი აცხადებენ, რომ დღეს მსგავსი ფაქტები არ ხდება, კონკრეტული შემთხვევაბი კი სამართალდამცავებმა უნდა გამოიძიონ.

„ეს არის პირველი აქცია და ეს აქციები გაგრძელდება აუცილებლად და იქნება პერმანენტული, ჩვენ აუცილებლად შევაჩერებთ იმ რეპრესიულ მანქანას, რომელიც დღეს ამოქმედდა ქვეყანაში, ჩვენ ვიქნებით ის ადამიანები, რომლებიც დავიცავთ სხვის შვილებს, რადგან ჩვენი შვილები უკვე სხედან ციხეში და ძალიან აქტიური სამოქალაქო მოძრაობა დაიწყება ამ მიმართულებით“, - განაცხადა ელისო კილაძემ.

ოპოზიციის შეფასებით კი ნარკოტიკების ჩადების პოლიტიკა ქვეყანაში უნდა შეიცვალოს. პარლამენტის ფრაქცია „მოძრაობა თავისუფლებისთვის -ევროპული საქართველოს“ თავმჯდომარე, გიგი წერეთელი მიიჩნევს, რომ საქართველოში ბევრი არასწორი რამ ხდება და ეს ხელისუფლების პასუხისმგებლობაა:

„აქ უნდა იყოს ალბათ ყველაზე უტყუარი მტკიცებულებები და ყველაზე უტყუარი ფაქტები, რომ ეს მართლაც ასეა და არავის არ უნდა მიეცეს ამის თქმის საშუალება, ეს ნორმალურ ქვეყანაში, სამწუხაროდ ჩვენთან ძალიან ბევრი არასწორი რამ ხდება და ეს არის ხელისუფლების პასუხისმგებლობა“, - აღნიშნა გიგი წერეთელმა.