დავით შავლიაშვილი სამეგრელო-ზემო სვანეთში მიმდინარე საგზაო სამუშაოებს ადგილზე გაეცნო

ბიზნესი & ეკონომიკა - 13:29, 03 Jun, 2013

838

დეპარტამენტის ხელმძღვანელობამ დაათვალიერა ინგირი-შამგონას ს/გზის კმ1-კმ7 მონაკვეთის; ზუგდიდი-ანაკლიას ს/გზის კმ24-კმ29 (დარჩელი-ანაკლიას) მონაკვეთის; ზუგდიდი-ანაკლიას ს/გზის 25-26 კმ-ზე სახიდე გადასასვლელებისა და მათთან მისასვლელი გზების რეაბილიტაციის სამუშაოები. ზუგდიდი-ჯვარი-მესტია-ლასდილის საავტომობილო გზაზე კი ხელმძღვანელი პირები მეწყრული მოვლენების შედეგად დაზიანებული მონაკვეთებისა და გზის დამცავი კედლების რეაბილიტაციის ღონისძიებების მიმდინარეობას დააკვირდნენ. აღნიშნული გზის იმ მონაკვეთებზე, სადაც ხშირია ქვათაცვენის შემთხვევები მიმდინარეობს მთის ფერდობების დამუშავება ბურღვა-აფეთქების გზითა და მთამსვლელების დახმარებით.

თავმჯდომარემ და დეპარტამენტის წარმომადგენლებმა ასევე, მოინახულეს მესტია-უშგულის გზა, სადაც უახლოეს პერიოდში სარეაბილიტაციო სამუშაოები დაიწყება. აღნიშნული გზის რეაბილიტაცია ძალიან მნიშვნელოვანია როგორც ადგილობრივების, ასევე, ტურისტებისთვისაც, რადგან მესტიას თეთნულდის სათხილამურო კომპლექსთან მისასვლელ გზასთან აკავშირებს. რამდენიმე თვეში მესტია-უშგული-თეთნულდის მიმართულებით, ზემო სვანეთის სტუმრები და ადგილობრივები რეაბილიტირებული გზით კომფორტულად იმგზავრებენ.