ნოკაუტი პირველივე რაუნდში - დავით ქირიას მორიგი შთამბეჭდავი გამარჯვება Kunlun Fight-ზე

სპორტი - 16:03, 13 Mar, 2017

22219

მსოფლიოს ერთ-ერთი საუკეთესო კიკბოქსიორი, გლორის 2014 წლის მსოფლიოს ჩემპიონი, Kunlun Fight 2016 -ის ფინალისტი დავით ქირია, რინგზე მორიგი შთამბეჭდავი გამარჯვებით ბრუნდება.

ქირიამ, 11 მარტს, იტალიის დედაქალაქ რომში Kunlun Fight-ის მსოფლიო ჩემპიონატი ოთხკაცა ტურნირის შთამბეჭდავი გამარჯვებით დაიწყო.

დავით ქირიამ პირველ ბრძოლაში ENFUSION ვერსიით მსოფლიოს მოქმედი ჩემპიონი, ესპანელი ჯონაი რისკო დიდი უპირატესობით დაამარცხა, ხოლო ტურნირის ფინალში კი რუმინელი კრისტიან მილეა პირველივე რაუნდში ნოკაუტით გამოთიშა ასპარეზობას და მსოფლიო ჩემპიონატის მერვედფინალში გავიდა.

ჯერჯერობით უცნობია, ვის დაუპირისპირდება ქართველი სპორტსმენი მერვედფინალში. მოწინააღმდეგის, ბრძოლის ჩატარების დროსა და ადგილის შესახებ, უახლოეს მომავალში გახდება ცნობილი.

Kunlun Fight-ი წარმოადგენს კიკბოქსინგის ჩინურ უმსხვილეს ორგანიზაციას, რომელშიც მონაწილეობას იღებენ მსოფლიოს საუკეთესო სპორტსმენები. KUNLUN FIGHT-ის 2017 წლის მსოფლიო ჩემპიონატში მონაწილეობას იღებს სხვადსხვა ქვეყნის 64 საუკეთესო კიკბოქსიორი, რომლებიც საწყის ეტაპზე ასპარეზობენ ოთხკაციან ტურნირებში. ტურნირის გამარჯვებული გადადის მერვედფინალში და აგრძელებს ტიტულისათვის ბრძოლას.

დავით ქირია Glory-ს მსოფლიო ჩემპიონი 2014 წელს გახდა. ქართველმა სპორტსმენმა ფინალში ენდი რისტი ნოკაუტით დაამარცხა.

2009 წელს კი ევროპის ჩემპიონი გახდა კიოკუშინკაი კარატეში, არის შავი ქამრის მფლობელი.

აღსანიშნავია, რინგზე საბრძოლველად გასვლისას ქართველ სპორტსმენს ტრადიციულად, ჩოხა აცვია. როგორც „ნიუპოსტთან“ ერთ-ერთ ინტერვიუში დავითმა განაცხადა, ეს მისთვის ძალიან საამაყო და მთავარი მოტივატორია.

„მეამაყება, როცა რინგზე ქართული ჩოხით გავდივარ. ეს ძალასაც მმატებს და მოტივცაისაც. გარდა ამისა, მინდა ქართული კულტურა და ტრადიციები მსოფლიოს დავანახო” - განაცხადა დავითმა.