"55 000 მიზეზი საქართველოს 6 ერში მისაღებად" - Wales online "ბორჯღალოსნებსა" და ქართველ გულშემატკივარზე

სპორტი - 11:59, 13 Mar, 2017

11428

"55 000 მიზეზი საქართველოს 6 ერში მისაღებად "- ამ სათაურით აქვეყნებს სტატიას ბრიტანული გამოცემა Wales online და საქართველო-რუსეთის მატჩზე გულშემატკივრების დასწრებას ეხმიანება.

"რაგბი ევროპის მატჩზე, ბორის პაიჭაძის სახელობის დინამო არენა სავსე იყო, როდესაც ბორღალოსნებმა უელსის მომავალი ოპონენტი - 28:14 დაამარცხეს" - წერს საიმონ ტომასი.

სტატიაში აღნიშნულია, რომ საქართველომ ამ სეზონზე უკვე მეოთხე გამარჯვება მოიპოვა და ეს ხდება იმის ფონზე, რომ იტალია კვლავ მარცხდება საფრანგეთთან 18:40.

„რაგბი საქართველოში ერთ-ერთი წამყვანი სპორტია და დღეს ეს კიდევ ერთხელ დამტკიცდა, როცა რუსეთთან თამაშს 50 000-ზე მეტი გულშემატკივარი დაესწრო. საქართველოს ნაკრები "ექვსი ერისკენ" მიიწევს , საქართველოში რაგბი უფრო ვითარდება" - ნათქვამია სტატიაში.

Wales online-ი აღნიშნავს, რომ საქართველოში რაგბის განვითარებას ხელს ყოფილი პრემიერ-მინისტრი, მილიარდერი ბიძინა ივანიშვილი უწყობს და დასძენს, რომ საქართველო მზად არის ექვს ერში გასაწევრიანებლად, წელიწადში 8.5 მილიონი ევრო გადაიხადოს.

ამის შესახეგ გავლენიანი ბრიტანული გამოცემა, დეილი მეილიც წერდა. გამოცემის ცნობით , ბიძინა ივანიშვილი მზად არის, ექვს ერში საქართველოს ნაკრების დაშვება ფინანსურად უზრუნველყოს.

შეგახსენებთ, ბორჯღალოსნებმა 12 მარტს რუსეთის ნაკრებს უმასპინძლეს და ანგარიშით - 28:14 დაამარცხეს.

შემდეგ შეხვედრას ბორჯღალოსნები 19 მარტს სტუმრად რუმინეთის წინააღმდეგ ჩაატარებენ.