რუსთავი 2-ში აღმასრულებლებით და ჯარით არ შევვარდებით - აქიმიძე ხალვაშთან საუბარს არ ადასტურებს

საზოგადოება - 19:33, 03 Mar, 2017

5273

ტელეკომპანია რუსთავი 2-ის ერთ-ერთი დამფუძნებელი ჯარჯი აქიმიძე უზენაესი სასამართლოს დიდი პალატის მიერ მიღებულ გადაწყვეტილებაზე საუბრობს. „ტვ პირველის“ გადაცემა „რეაქციაში“ ჯარჯი აქიმიძემ განაცხადა, რომ იგი და დავით დვალი ქიბარ ხალვაშს აღნიშნულ თემაზე სასაუბროდ ჯერ არ შეხვედრიან:

„მინდა გაგიცრუოთ იმედები და გითხრათ, რომ ჩვენს შორის საუბარი არ შემდგარა, გვქონდა გუშინ მოკლე კომუნიკაცია და შევთანხმდით, რომ ვისაუბრებდით, ეს საუბარი კიდევ წინ არის. ჩვენ ვიყავით სათავეებთან, ვაკეთებდით და ვმუშაობდით იმ ტელევიზიაში, რომელიც იყო თავისუფალი, იქ არ იყო დიქტატი, ეს ტელევიზია იყო ასეთად ჩაფიქრებული 94 წლიდან. დავიწყეთ მისი კეთება, მიუხედავად უამრავი წინააღმდეგობისა 2003 წლამდე მოვიტანეთ ასეთად. ერთ მშვენიერ დღეს იგი წაგვართვეს, ქიბარ ხალვაში იყო ის ერთერთი რგოლი, რომელიც იმ შემთხვევაში წარმოადგენდა ადამიანს, რომელსაც ჩაბარდა რუსთავი 2, მან გააგრძელა რუსთავი 2-ის მართვა თუ პატრონობა, შემდეგ გადავიდა სხვა რგოლზე, სხვა ოფშორზე. 2012 წელს მას შემდეგ რაც სააკაშვილის რეჟიმი დასრულდა, პროკურატურაში შევიტანეთ საჩივარი, რათა გამოეძიებინათ რა მოხდა 2004 წელს, დაიწყო გამოძიება, შემდეგ საქმე გაჩერდა, ამასობაში გაირკვა, რომ ქიბარ ხალვაშმა სასამართლოში იჩივლა და დაიწყო დამოუკიდებელი პროცესი, გამოთქვა სურვილი, რომ მომხდარიყო ჩვენი შეხვედრა, იმის გამო, რომ ჩვენი გზები გარკვეულწილად იკვეთებოდა, შეგვეთანხმებინა ერთმანეთთან ხომ არ შეიძებოდა ჩვენი თანამშრომლობა. ჩვენთვის პრაგმატულად, იქიდან გამომდინარე რომ სასამართლოში ჩივილის ვადები ამოწურული იყო, პროკურატურაში საქმე იყო გაჩერებული, ქიბარ ხალვაშს ვკითხეთ რა თანამშრომლობაზე შეიძლება ყოფილიყო საუბარი, მისი პირველი ფრაზა იყო ის, რომ იგი იყო გაუგებრობაში მოხვედრილი და იმისათვის, რომ გარკვეულიყო საუბარი შემოგვთავაზა, ჩვენ მაშინ რა თქმა უნდა არავითარი ლაპარაკის თავი არ გვქონდა, ასე დასრულდა ჩვენი შეხვედრა.

იმ შემთხვევაში თუ ჩვენ დავიბრუნებთ ჩვენს წილს და თუ ჩვენ დავიბრუნებთ მენეჯმენტს, ეს ნიშნავს იმას რომ იგი გათავისუფლდება ყველანაირი პარტიული წნეხისგან, აღარ იქნება ენმ-ს ხელში, შეგვიძლია პირობა დავდოთ, რომ ტელევიზია არ იყო ჩაფიქრებული არანაირ პარტიულ ტელევიზიად, ამოსავალი წერტილი იყო ის, რა იქნებოდა ჩვენ შორის პირველი შეხების წერტილები. ჩვენ ჩამოვწერეთ სამი პრინციპი, არავითარ შემთხვევაში რუსთავი 2 არ უნდა იყოს პროსამთავრობო, ოცნების, ის აუცილებლად უნდა იყოს კრიტიკული.

ჩვენი საუბარი ქიბარ ხალვაშთან საბოლოო, არ მომხდარა წინასწარ ვერანაირ დასკვნებს ვერ გავაკეთებ, რამდენიმე თვის წინ რაღაც საკითხებზე შევთანხმდი, არანაირი აღმასრულებლებით, ჯარით, ჩაფხუტებით არ შევვარდებით, დაახლოებით 40 პროცენტი მაინც არის იქ ის ხალხი რომლებიც ჩვენთან ერთად აკეთებდა ამ ტელევიზიას, ჩვენ გვინდა დავიბრუნოთ ისეთი რუსთავი 2 როგორიც იყო 2003 წლამდე, ეს ტელევიზია უნდა იყოს ისეთი, როგორიც იყო, არ გვინდა იყოს ისეთი როგორიც არის დღეს“, - განაცხადა ჯარჯი აქიმიძემ.