"ეს არა მხოლოდ ჩემს წინააღმდეგ, საერთოდ ეკლესიის წინააღმდეგ დაწყებული ბრძოლაა"- მეუფე დიმიტრი

საზოგადოება - 11:27, 24 Feb, 2017

11813

ბათუმისა და ლაზეთის მიტროპოლიტმა დიმიტრი შიოლაშვილმა „გურია ნიუსთან“ ინტერვიუში საპატრიარქოს გარშემო განვითარებულ მოვლენებზე და ე.წ „ციანიდის საქმეზე“ ისაუბრა. როგორც მეუფე დიმიტრი აცხადებს მისთვის უცნობია მიზეზი, თუ რატომ თქვა პატრიარქმა დაკავებულ დეკანოზთან გიორგი მამალაძესთან შეხვედრაზე უარი:

„_ იცით, რომ ოცი დღით ვახლდი პატრიარქს გერმანიაში და ბათუმში ერთი დღით ჩამოვედი ჯანმრთელობის მდგომარეობის გამო. ახლა ვბრუნდები საპატრიარქოში. მეც ვიცოდი, რომ მამა გიორგის პატრიარქი უნდა შეხვედროდა, თუმცა, შემდეგ უარი ეთქვა. ამის მიზეზი არ ვიცი. ჩავალ და გავარკვევ, _ აღნიშნა ჩვენთან საუბრისას მეუფე დიმიტრიმ.

_ თქვენ აპირებთ პირადად შეხვდეთ მამა გიორგის?

_ არა, რადგან სამართალდმაცავებმა გვითხრეს, რომ უსაფრთხოების მიზინით ჯობია თავი შევიკავოთ.

_ თუ მას შეხვედრის სურვილი აქვს, რა უსაფრთხოებაზეა საუბარი?

_ მე მაქვს ინფორმაცია, რომ ჰქონდა სურვილი პატრიარქთან და სინოდის ზოგიერთ წევრთან შეხვედრის. თუმცა, მე ამ სიაში არ ვყოფილვარ.

_ რატომ? როგორც ცნობილია, მამა გიორგი თქვენთან დაახლოებული პირი იყო...

_ არ ვიცი, ვერ გეტყვით.

მეუფე დიმიტრი ჭყონდიდელი მიტროპოლიტის პეტრე ცაავას მიერ გაკეთებულ განცხადებასაც გამოეხმაურა, როგორც მეუფე პეტრე აცხადებს განვითარებული მოვლენები მეუფე დიმიტრის მიმართ დაწყებული ბრძოლაა.

"არ ვიცი, მეუფე პეტრეს რა ინფორმაციები აქვს, მაგრამ მე მიმაჩნია, რომ ეს არ არის მხოლოდ ჩემს წინააღმდეგ. ეს არის საერთოდ ეკლესიის წინააღმდეგ დაწყებული ერთგვარი კამპანია, ბრძოლა _ რაც გინდათ, ის დაარქვით. მე ერთი ნაწილი ვარ ამ ყველაფრის.

_ბრძოლა ვისგან მომდინარეობს?

_ არ ვიცი. მამა გიორგის რომ შევხვდები, მე მაქვს კითხვები და ალბათ, გასცემს ამ კითხვებს პასუხს,"-აცხადებს მეუფე დიმიტრი.

წყარო „გურიანიუსი“