საფეხბურთო კლუბ „ზუგდიდის“ ყოფილი კაპიტანი, ნიკოლოზ აფაქიძე სამი თვის კუთვნილ ხელფასს ითხოვს.

როგორც ფეხბურთელმა „ნიუპოსტს“ განუცხადა, უკვე რამდენიმე თვეა, რაც ის და გუნდის სხვა მოთამაშეები, კლუბს ფინანსური დავალიანებების გასტუმრებას სთხოვენ.

აფაქიძის თქმით, შეთანხმების თანახმად, დავალიანება 20 თებერვალს უნდა დაფარულიყო, თუმცა, ჯერჯერობით, ანგარიშზე თანხა არ დარიცხულა.

როგორც ნიკოლოზ აფაქიძე „ნიუპოსტთან“ საუბრისას აცხადებს, აპირებს სადისციპლინო კომიტეტს მიმართოს. ფეხბურთელის ინტერესებს კი ორგანიზაცია „სოციალური დიალოგი სპორტში“ და მისი ხელმძღვანელი, კესო ჩხიკვაძე დაიცავს.

შეგახსენებთ, ს.კ. ზუგდიდის ფეხბურთელები სახელფასო დავალიანების დაფარვას, უკვე რამდენიმე თვეა, ითხოვენ. კლუბი უმაღლეს ლიგას გამოეთიშა და მეორე ლიგაში თამაშობს.