"მამა გიორგიმ მითხრა, რომ ციანიდი სასწრაფოდ სჭირდებოდა, სანაცვლოდ საპატრიარქოში თანამდებობას დამპირდა"- სკანდალური საქმის დეტალები

საზოგადოება - 14:47, 20 Feb, 2017

30543

“ციანიდის საქმის“ მთავარი მოწმე ირაკლი მამალაძე „კვირის პალიტრასთან“ ინტერვიუში საქმის დეტალებზე საუბრობს. მისი თქმით დეკანოზმა მამალაძემ ციანიდის შოვნა მას სთხოვა. დახმარების სანაცვლოდ კი საპატრიარქოში თანამდებობასაც დაპირდა:

"როდესაც მამა გიორგიმ ციანიდის შოვნა მთხოვა, მაშინვე დავეჭვდი, თუმცა ეს არ გამხდარა ჩემი პროკურატურაში მისვლის საბაბი. მომდევნო შეხვედრაზე დავრწმუნდი რომ შესაძლოა ადგილი ჰქონოდა დანაშაულებრივ განზრახვას. მამა გიორგი ამ საქმეში დახმარების სანაცვლოდ მპირდებოდა საერო თანამდებობას საპატრიარქოში. როდესაც ჩემს მეგობრებს გავუზიარე ეჭვები იმ სავარაუდო პირებზე, რომელთა წინააღმდეგაც შესაძლოა მზადდებოდა დანაშაული, მირჩიეს ეს ინფორმაცია აუცილებლად გამეცნო სამართალდამცავი ორგანოებისთვის, თუმცა მაშინ კატეგორიული უარი განვაცხადე. მეორე თუ მესამე დღეს ჩემს ტელეფონზე მამა გიორგიმ დამირეკა და ისეთი რაღაც მითხრა, რომ ნამდვილად მქონდა პერსპექტივა გავმხდარიყავი მძიმე დანაშაულის თანამონაწილე. ეს ის დღე იყო როცა პატრიარქი გერმანიაში გაფრინდა. მამა გიორგიმ მითხრა, რომ "ის" სასწრაფოდ სჭირდებოდა, რადგან პატრიარქი გერმანიაში გაფრინდა და თავადაც აპირებდა ჩასვლას. ამ ზარის შემდეგ სხვა გზა აღარ მრჩებოდა, პროკურატურაში მივედი. მე მივაწოდე ინფორმაცია, რომ ციანიდის შოვნას მთხოვდნენ. დანარჩენი რამდენად რეალური იყო ჩემი ვარაუდი, პროკურატურას უნდა დაედგინა. რა თქმა უნდა მხოლოდ ჩემს ვარაუდზე დაყრდნობით არავის დააკავებდნენ, რომ არ ყოფილიყო უკვე გამოძიება და უტყუარი მტკიცებულებები. მამა გიორგის ციანიდი ჩემგან არ შეუძენია, პროკურატურა იკვლევს ვისგან შეიძინა".- განაცხადა ირაკლი მამალაძემ.