პატრიარქის ანდერძის გაყალბების მცდელობა - თეოლოგის სკანდალური განცხადება

საზოგადოება - 13:34, 20 Feb, 2017

26594

თეოლოგი და საქართველოს მართლმადიდებელი ეკლესიის ისტორიის მკვლევარი გიორგი ტიგინაშვილი “კვირის პალიტრასთან“ ინტერვიუში სკანდალურ განცხადებას აკეთებს. მისი თქმით, სატელეფონო საუბარში, რომელიც „ციანიდის საქმესთან“ დაკავშირებით პროკურატურას გააჩნია, საუბარო მიდის იმაზე, რომ პატრიარქი შესაძლოა, ოპერაციის დროს დაიღუპოს. ტიგინაშვილის განცხადებით, ილია მეორის გერმანიაში გამგზავრებამდე საპატრიარქოდან გაქრა პატრიარქის ფაქსიმილე, რაც თეოლოგის თქმით, შესაძლოა ილია მეორის ანდერძის გაყალბების მცდელობასთან იყოს კავშირში:

„უკვე ბევრმა გაიგო სატელეფონო ჩანაწერების ამბავი, საიდანაც, ჩემი ინფორმაციით, დგინდება, რომ სავარაუდოდ, მეუფე იაკობისა და შორენა თეთრუაშვილის მოკვლა იგეგმებოდა. როგორც ვიცი, არც ერთ მათგანს დღესაც ახლოს არ აკარებენ პატრიარქს... საპატრიარქოს კულუარებში ამბობენ, რომ საოპერაციოდ წასვლის წინ პატრიარქის მდგომარეობა ძალიან დამძიმებული იყო. პროკურატურის ხელთ არსებულ სატელეფონო საუბრებში, ჩემი ინფორმაციით, მამა გიორგი მამალაძესთან ერთ-ერთი მაღალი იერარქიის პირი ამბობს, რომ პატრიარქი, შესაძლოა, ოპერაციის დროს დაიღუპოს... ამ ინფორმაციას არ ახმაურებდნენ, რათა პანიკა არ ამტყდარიყო. დღეს უკვე შეიძლება ამაზე ლაპარაკი, რადგან, საბედნიეროდ, ყველაფერი კარგად დასრულდა.

როგორც ვიცი, პატრიარქის გერმანიაში წასვლამდე საპატრიარქოდან გაქრა უწმინდესის ფაქსიმილე. როგორც ამბობენ, უნდა შედგენილიყო წერილი, რომელიც საზოგადოებას უწმინდესის გაყალბებული ხელმოწერით წარედგინებოდა მისი გარდაცვალების შემთხვევაში. წერილში ნათქვამი იქნებოდა, რომ დაქვრივებულ საეკლესიო ტახტს 40 დღის განმავლობაში უხელმძღვანელებდა ერთ-ერთი სასულიერო პირი და ის მოამზადებდა მომავალი პატრიარქის არჩევნებს. სწორედ ეს უნდა გამოიძიოს პროკურატურამ,”- აცხადებს ტიგინაშვილი.