საქართველოს მართლმადიდებელი ეკლესიის პროტოპრესვიტერი მამა გიორგი ზვიადაძე დეკანოზ გიორგი მამალაძის საქმესა და პატრიარქის მიმართვის არასრული ვერსიის გავრცელების შესახებ საუბრობს. პროტოპრესვიტერის თქმით პროკურატურამ აღნიშნულ საქმეზე საპატრიარქოს შესაძლებლობა მისცა გასცნობოდა დეტალებს:

„ძალიან რთული ვითარება შეიქმნა, ძალიან დიდი ზიანი მიადგა ეკლესიას, ვფიქრობთ, რომ ჩვენს საზოგადოებას, საქართველოს მოსახლეობას, აქვს ძალიან მაღალი ინტერესი ამ საკითხისადმი. არ ვიცი ვინ არის პასუხისმგებელი იმაზე, ვინც გაავრცელა არასრული ვერსია, რა მოსაზრებით ხელმძღვანელობდა ეს პიროვნება, რა მიზანდასახულობა ჰქონდა მას, ამიტომ ძალიან რთულია საუბარი გამოკვლევის გარეშე. რთულია საუბარი იმაზე, თუ რატომ გააკეთა რომელიმე პიროვნებამ ეს, როცა საკუთარ თავს მისცა უფლება გაევრცელებინა პატრიარქის არასრული ვერსია, ნებისმიერი ადამიანისთვის ვფიქრობ ცხადია თუ რა მძიმე მდგომარეობაში აღმოვჩნდით ყველა, როდესაც გაჩნდა ასეთი ეჭვი დეკანოზ მამა გიორგისთან დაკავშირებით.

ეს ძალიან მძიმე ბრალდებაა, საქართველოს კათოლიკოს პატრიარქის სიცოცხლის ხელყოფა ან რომელიმე საეკლესიო პირის ან რომელიმე ადამიანის სიცოცხლის ხელყოფა. მკვლელიბა არის მძიმე ცოდვა, მაგრამ ეს ცოდვა კიდევ უფრო მძიმდება, როდესაც ვინმეს განზრახვა არის ხელყოს საქართველოს კათოლიკოს პატრიარქის სიცოცხლე. არავის არ აქვს მოლოდინი იმისა, რომ მამა გიორგიმ განიზრახა რომელიმე სასულიერო პირის ან ნებისმიერი პირის სიცოცხლის ხელყოფა. საქართველოს საპატრიარქო ყურადღებით დააკვირდება მოვლენებს, მთავარმა პროკურატურამ მისცა საქართველოს საპატრიარქოს შესაძლებლობა რომ ამ მასალებს გაცნობოდა. უნდა დაველოდოთ მისი უწმინდესობის საქართველოში ჩამობრძანებას“, - განაცხადა მამა გიორგი ზვიადაძემ.