„ეს არის „კაგებეშნიკური“ ინტრიგა, ნაწილობრივ მეუფე დიმიტრის წინააღმდეგ მიმართული“ - მეუფე პეტრე დეკანოზის უდანაშაულობაში დარწმუნებულია

საზოგადოება - 15:10, 17 Feb, 2017

6720

ჭყონდიდის მიტროპოლიტი მეუფე პეტრე ე.წ. მატროსოვის ციხიდან გამოვიდა, სადაც იგი დეკანოზ გიორგი მამალაძეს შეხვდა. მეუფე პეტრემ შეხვედრიდან გამოსვლის შემდეგ ჟურნალისტებთან საუბრისას განაცხადა, რომ მისი ეჭვები 100%-ით გამართლდა.

მეუფე პეტრეს განცხადებით, პატრიარქის საქართველოში დაბრუნების შემდეგ, ხელისუფლება და საულიერო პირები უნდა შეიკრიბნონ და ასევე, ერთობლივი პრესკონფერენციაც მოაწყონ:

„ყველაფერი უნდა გაკეთდეს, მამა გიორგიმ პატრიარქის ჩამობრძანებისთანავე უნდა დატოვოს საპყრობილე, მე პირადად მზად ვარ ჩემი სიცოცხლის ბოლო წუთამდე ვიბრძოლო იმისათვის, რომ ეს ადამიანი, როგორც უდანაშაულო იყოს დაცული. როდესაც ჯგუფი პატრიარქის თანმხლები პირებისა და წმინდა სინოდის წევრებისა ჩამოვა და ჩვენ შევიკრიბებით, ხელისუფლებასთან ერთად უნდა დავსხდეთ და მოვიფიქროთ, თუ როგორ შეიძლება განცხადება გაკეთდეს, ალბათ ერთად საერთო პრესკონფერენციის გაკეთება მოგვიწევს. მე ვამბობ, რომ მამა გიორგი არის აბსოლუტურად უდანაშაულო და ეს არის „კაგებეშნიკური“, მზაკვრული, დახვეწილი ინტრიგა, რომელშიც ყველა გაეხვა შარში, ჩემი ეჭვია, რომ ეს ნაწილობრივ ასევე იყო მიმართული ბათუმისა და ლაზეთის მიტროპოლიტ მეუფე დიმიტრის წინააღმდეგ. მეუფე იაკობზე ვთქვი, რომ პატრიოტი ადამიანია, მაგრამ ის არის ასევე შემადგენელი ნაწილი ამ ინტრიგისა უნებლიედ“, - განაცხადა მეუფე პეტრემ.