ბათუმისა და ლაზეთის მიტროპოლიტი დიმიტრი (შიოლაშვილი) სოციალურ ქსელში განცხადებას ავრცელებს. მეუფე დიმიტრი დიდ გულისტკივილს გამოხატავს მომხდარი მოვლენების გამო, მისი თქმით ის გამოძიებას ენდობა და მის დასრულებას ელოდება:

„გამოვხატავ ჩემს დიდ გულისტკივილს მომხდარი მოვლენების გამო. ბრალის დამტკიცების შემთხვევაში შეიძლება ჩაითვალოს საუკუნის ტრაგედიად. ველოდებით გამოძიების დასრულებას, რომელსაც ნდობას ვუცხადებთ. ვიმედოვნებთ, კანონის უმკაცრესი სასჯელით დაისჯება ამ ვერაგული განზრახვის ყველა მონაწილე, განურჩევლად მათი სტატუსისა. თხოვნით მოგმართავთ ყველას, გამოძიების დასრულებამდე თავი შეიკავოთ ვარაუდებისაგან“, - აღნიშნულია ბათუმისა და ლაზეთის მიტროპოლიტის დიმიტრის (შიოლაშვილი) განცხადებაში, რომელსაც ის სოციალურ ქსელში ავრცელებს.

10 თებერვალს საქართველოს პროკურატურის თანამშრომლებმა ჩატარებული საგამოძიებო მოქმედებების შედეგად მკვლელობის მომზადების ფაქტზე ბრალდებულის სახით დეკანოზი გიორგი მამალაძე დააკავეს. პროკურატურის ცნობით, გამოძიების ამ ეტაპზე მოპოვებული მტკიცებულებებით ირკვევა, რომ მამალაძე ამზადებდა მაღალი იერარქიის სასულიერო პირის მკვლელობას, სწორედ ამ მიზნით შეიძინა მან გამოძიებით ამ ეტაპზე დაუდგენელი პირისგან შხამიანი ნივთიერება - ციანიდი.