რიტუალური მკვლელობის საქმეზე სასამართლო განხილვა განსასჯელის, ბექა შენგელიას გამოუცხადებლობის გამო გადაიდო.

როგორც თბილისის საქალაქო სასამართლოში შეკრებილ ჟურნალისტებს მისმა ადვოკატმა ლალი ბიწოშვილმა განაცხადა, შენგელიას ჯანმრთელობის მდგომარეობა დამძიმდა.

ბრალდებული საავადმყოფოშია გადაყვანილი.

ბიწოშვილი აცხადებს, რომ საქმეშიც არის მტკიცებულებები იმის შესახებ, რომ შენგელიას ფსიქიკასთან დაკავშირებული პრობლემები ჰქონდა.

ადვოკატი ამბობს, რომ განსასჯელი აგრესიულია და ძლიერ პრეპარატებს უკეთებენ.

სასამართლო პროცესი, რომელიც დახურულ რეჟიმში იმართება, 24 თებერვალს, 11:00 საათზე გაგრძელდება.

ცნობისთვის, 76 წლის ქალის მკვლელობისთვის ბექა შენგელია მარიამ ყოჩიაშვილი და არასრულწლოვანი გოგო სამართალდამცავებმა 4 ნოემბერს დააკავეს.

იმავე დღეს აიყვანეს კიდევ ორი პირი, რომელთაც გამოძიება მკვლელობის შეუტყობინებლობისა და დანაშაულის დაფარვას ედავება.

გამოძიებამ დაადგინა, რომ სამმა ბრალდებულმა, 2016 წლის 19 ოქტომბერს, წინასწარ შემუშავებული დანაშაულებრივი გეგმის თანახმად, თბილისში, ბერი გაბრიელ სალოსის ქუჩაზე მდებარე კორპუსის საცხოვრებელ ბინაში, ამავე მისამართზე მცხოვრები, ბრალდებულ ირმა ყოჩიაშვილის დედა, ლუბა ყოჩიაშვილი ჯერ ელექტროშოკით გათიშეს, ხოლო შემდგომ - გაგუდეს და დანის დარტყმით მოკლეს. ბრალდებულებმა გარდაცვლილის ცხედარი დიდი ზომის ჩანთაში მოათავსეს და თბილისში, ბექა შენგელიას ნაქირავებ ბინაში გადაიტანეს, სადაც გვამი დაანაწევრეს.

იმავე საღამოს, დაბინდების შემდგომ, ბრალდებულებმა დანაწევრებული გვამი ორი ჩანთის მეშვეობით გლდანის N8 საპყრობილის მიმდებარედ არსებულ გაუქმებულ ნაგავსაყრელზე გადაიტანეს, წინასწარ, მოცემული დანაშაულის ჩადენის მიზნით შეძენილი ბენზინი გადაასხეს, ცეცხლი წაუკიდეს და კვალის დასაფარად, თხრილში დაწვეს.

"ნიუპოსტი" საკუთარ წყაროზე დაყრდნობით, წერდა, რომ ეს ერთადერთი საქმეა, სადაც კანიბალიზმის ნიშნები იკვეთებოდა.

წინა სასამართლოზე 76 წლის ქალის მკვლელობაში ბრალდებულმა კანიბალიზმის ფაქტი აღიარა.