დეკანოზ გიორგი მამალაძის დაკავების საქმეზე კომენტარს აკეთებს ჭყონდიდელი ეპისკოპოსი, მეუფე პეტრე, რომელმაც აღნიშნულ საკითხზე „ქრონიკის“ პირდაპირ ეთერში ისაუბრა. მეუფე აცხადებს, რომ სამართალდამცავებმა უნდა დაიცვან დაკავებული დეკანოზის უსაფრთხოება:

„ძალიან უხერხულია რა ფაქტიც გაჟღერდა, მინდა გამოვხატო პირადი მოსაზრება და თხოვნა, ძალიან გულისყურით მოეკიდოს საგამოძიებო ორგანოები ამ ფაქტს, რამეთუ გაჟღერებულმა ინფორმაციამ გამოიწვია საზოგადოებაში ბევრი კითხვის ნიშანი. თუ გავითვალისწინებთ იმ ფაქტს, რომ ხსენებული დეკანოზი გიორგი მამალაძე ორი წელია ხელმძღვანელობს საპატრიარქოს ქონების მართვის სამსახურსა და კლინიკას, რომელთან მიმართებითაც ბევრი კითხვები იყო, რომლებიც ჩემს მიერ არც თუ ისე დიდი ხნის წინ დახარისხებულ პრობლემებს უკავშირდება, არ არსებობს ორი აზრი, რომ ეს არის ის პრობლემა, რომელიც ჩრდილოვანი მმართველობის სახით არსებობს საქართველოს საპატრიარქოში" - განაცხადა მეუფე პეტრემ.

ჭყონდიდელი ეპისკოპოსი შორენა თეთრუაშვილზეც საუბრობს და ამბობს, რომ მომხდარი ფაქტით ყველაზე დიდი დისკომფორტი სწორედ მას შეექმნება.

,,ეს ქალბატონი მართავდა ასევე ეკონომიკურ სამსახურს მანამ, სანამ დაინიშნებოდა მამა გიორგი, რა თქმა უნდა, ყველაზე დიდი დისკომფორტი ამ ქალბატონს წარმოექმნა. მე მექნება თხოვნა სასჯელაღსრულების სამსახურთან, გააძლიერიონ და პირად კონტროლზე აიყვანონ დაპატიმრებული დეკანოზი და დაიცვან მისი უსაფრთხოება, მანამ, სანამ დაარღვევს დუმილს. მან აუცილებლად უნდა დაარღვიოს დუმილი და გაგრძელდეს გამოძიება.

წლების მანძილზე ხშირად ვრცელდება დეზინფორმაცია, შანტაჟი, ეს თემა არსებულმა ქალბატონმა დაამკვიდრა, რომელიც ინტრიგებით მართავს საპატრიარქოს. ალბათ გამოძიება დაინტერესდება, როგორ აღმოჩნდა იგი საპატრიარქოში მკვლელობის ბრალდებით და როგორ მოიპოვა განუსაზღვრელი ძალაუფლება, მაშინ, როდესაც საქართველოს პირველი პრეზიდენტის მკვლელობა არ არის გამოძიებული და მის დამხობაში ამ რუხი კარდინალის ძალებს მიუძღვის წვლილი“, - განაცხადა მეუფე პეტრემ.