ირაკლი საღინაძე, პროდიუსერი: რაც ფინანსური პრობლემები გაჩნდა მას შემდეგ მიდის მუშაობა, რომ ფინანსური პრობლემები მოგვარებულიყო და გამოჩნდნენ ადამიანები, რომლებიც დაგვიდგნენ გვერდით, შემოვიდნენ თანადაფინანსებაში, ძირითადი ფინანსები თავიანთ თავზე აიღეს და გაჩნდა იმის შესაძლებლობა, რომ განვაახლოთ მარტის ბოლოდან გადაღება. სამშენებლო კომპანია „სვეტმა“ აიღო თავის თავზე ამ სეზონის დაფინანსების დიდი ნაწილი.

- ქასთინგიც ხომ არ გამოცხადდება, მსახიობების შეცვლა ან ახლების დამატება ხომ არ იგგმება?

- ჯერჯერობით არაფერი ახალი არ დაემატება, ხელშეკრულებაზე ხელი ჯერ არ მოგვიწერია, პრინციპულად შეთანხმება შემდგარია, მაგრამ იურიდიული დეტალები ზუსტდება, იმედია ძალიან მალე მოვრჩებით ამ პროცედურებს, დაფინანსება წამოვა და მუშაობის დაწყებას შევძლებთ. აი შემოქმედებით მხარეზე მერე ვისაუბროთ.

-სერიალი იმდენად პოპულარული იყო, ალბათ ისიც იცოდით რომ სპონსორი აუცილებლად გამოჩნდებოდა...

- არ იყო ასე მარტივადაც საქმე, საკმაოდ შთამბეჭდავ თანხებზეა საუბარი, სხვა კომპანიებისგანაც იყო დაინტერესება, მაგრამ როდესაც იგებდნენ თუ რამდენი იყო საჭირო იმისათვის, რომ სეზონი დაფინანსებულიყო, ძირითად შემთხვევაში უარს ამბობდნენ...

ბევრი კომბინაციაც განიხილებოდა, მაგრამ ეს აზარალებდა სერიალს, მის შინაარსს. რაც სამომავლოდ დაუკარგავდა ხასიათს, განწყობასა და ხალისს ამ ყველაფერს, გული ძალიან მწყდებოდა, რა თქმა უნდა სერიალი ძალიან დიდი მოწონებით სარგებლობდა, განვითარების გზაზე ვიდექით და ფინანსური პრობლემების გამო გავჩერდით. ამიტომ დღეს პოზიტიური განწყობა გვაქვს. განსაკუთრებული მონდომებით შევუდგებით ახალ საქმეს.

-თქვენი გამორჩეული სერიალი რომელია - ჩცდ თუ ხელოვნური სუნთქვა?

-მშობელს რომ ეკითხებით ვინ უფრო გიყვარსო დაახლოებით იგივე შეკითხვაა, მაგრამ, გულახდილად რომ გიპასუხოთ „ჩემი ცოლის დაქალები“ ჩემთვის განსაკუთრებულია. ესეც ძალიან კარგი სერიალია, ძალიან კარგი პროექტი, მაგრამ „ჩემი ცოლის დაქალები“ გაცილებით შთამბეჭდავი და გლობალური მოვლენა არის ქართული ტელე-სივრცისთვის.

დეა თავბერიძე