ბრძოლა თავისუფალი მედიისთვის - რუსთავი 2-ის მხარდამჭერ აქციას საზოგადოებისთვის ცნობილი სახეები და სტუდენტებიც უერთდებიან

საზოგადოება - 11:07, 10 Feb, 2017

3194

დღეს დაგეგმილ აქციას, რომელიც რუსთავი 2-ის მხარდასაჭერად იმართება საზოგადოებისთვის ცნობილი სახეებიც უერთდებიან.

ისინი დამოუკიდებელი მედიის შენარჩუნების აუცილებლობაზე საუბრობენ.

„ეს არის არხი, რომელიც არის ყველაზე პროფესიონალური და ყველაზე რეიტინგული ჩვენს ტელესივრცეში, გულდასაწყვეტია და დასანანია, თუ ამის საშუალება არხს აღარ ექნება. ქვეყანაში აუცილებელია არსებობდეს ალტერნატიული აზრი, გასაგებია, რომ რუსთავი 2 ოპოზიციურ არხად ითვლება, მაგრამ ეს არ ნიშნავს იმას, რომ ადამიანს ან ტელევიზიას არ ჰქონდეს თავისი აზრის უფლება “- განაცხადა ქართული ნაციონალური ბალეტის დირექტორმა, ნინო სუხიშვილმა.

გიორგი უშიკიშვილიც თვლის, რომ დემოკრატიული სახელმწიფოს მთავარი მონაპოვარი სიტყვის თავისუფლებაა.

"დემოკრატიული სახელმწიფო შედგება სიტყვის თავისუფლებისგან, ამიტომ ამ მთავარი ფუნდამენტის შენარჩუნება ჩვენთვის და ჩვენი მომავალი თაობისთვის ძალიან მნიშვნელოვანია"- თქვა ხელოვანმა.

პოლიტიკურ სუბიექტებთან ერთად, დღეს დაგეგმილ აქციაზე მისვლას სტუდენტებიც გეგმავენ, რომლებმაც გუშინ რუსთავი 2-ის მხარდასაჭერად უზენაეს სასამართლოსთან აქცია გამართეს.

რუსთავი 2-ის მხარდასაჭერად დღეს აქცია მსვლელობა რუსთაველის მეტროსთან 13:30 საათზე დაიწყება და უზენაეს სასამართლოსთან დასრულდება.