საზოგადოებრივი მაუწყებლის სამეურვეო საბჭო ვასილ მაღლაფერიძის მიერ მომზადებული სამოქმედო გეგმის განხილვას იწყებს. არხის გენერალირ დირექტორს საბჭოს წევრები უსმენენ. შეხვედრა უკვე ერთი საათია მიმდინარეობს.

სამეურვეო საბჭოს რამდენიმე წევრისთვის მიუღებელია ის სამქომედო გეგმა, რომელიც მენეჯმენტმა გასულ კვირას გაასაჯაროვა. მათი განცხადებით, გეგმაში ცვლილებები აუცილებელია.

საქართველოს საზოგადოებრივი მაუწყებლის სამეურვეო საბჭოს თავმჯდომარის გრიგოლ გოგელიას თქმით, სამოქმედო გეგმასთან დაკავშირებით სხვადასხვა თემებზე კითხვები არსებობს.

„ბევრი კითხვა იქნება ალბათ. ეს იქნება სერია შეხვედრების, რომელზეც ჩვენ შევეცდებით შევჯერდეთ, უფრო დეტალიზაცია გავაკეთოთ და შემდეგ მივიღოთ ისეთი გადაწყვეტილება, რაც წაადგება საზოგადოებრივ მაუწყებელს,“ - განაცხადა გოგელიამ.

სულხან სალაძე აცხადებს, რომ წარმოდგენილ გეგმას და დებულებაში ცვლილებებს მისი მხარდაჭერა არ ექნება.

„მე ველოდები ალტერნატიულ წინადადებებს, ველოდები ამ შემოთავაზების, რაც მენეჯმენტმა წარმოადგინა, გადამუშავებულ ვერსიებს და ის კითხვები, რომელიც დაისმება ამ პროცესში, იმედს ვიტოვებ, რომ ხელს შეუწყობს ამ დოკუმენტის გაკეთილშობილებას,“ - განაცხადა სულხან სალაძემ.