"ზარი ახლობელთან“ - ქრთამის სახით აღებული 50 ათასი ლარი და ოზურგეთიდან გაქცეული კომპანია

კრიმინალი - 16:17, 04 Feb, 2017

11211

გავრცელებული ინფორმაციით, ქალაქ ოზურგეთის მერიამ, ფირმა "პირამიდას" - ტენდერით გათვალისწინებული სამუშაოების შეუსრულებლობის გამო, ხელშეკრულება შეუწყვიტა.

არაოფიციალურად ვრცელდება ინფორმაცია, რომ ქალაქის მერიამ ხელშეკრულება აღნიშნულ კომპანიას მას შემდეგ გაუწყვიტა, რაც ტენდერით გათვალისწინებული თანხის დარჩენილი ნაწილი მთლიანად გადაურიცხა, რომლის შემდეგაც "პირამიდა" - ნაცვლად სამუშაოების დასრულებისა, ხელმძღვანელებიანად გაქრა.

თუ რა სამუშაოებს ახორციელებდა კომპანია, რა ვალდებულებები აიღო ტენდერის პირობებში და რა ვერ შეასრულა, ამასთან დაკავშირებით "გურიის მოამბე" ქალაქ ოზურგეთის მერიას დაუკავშირდა, საიდანაც ამ თემაზე კონკრეტული პასუხი ვერ მივიღეთ:"ქალაქ ოზურგეთის მერია აქამდეც მოქმედებდა და ახლაც კანონის შესაბამისად მოქმედებს"-გვითხრეს პრეს სამსახურში.

არაოფიციალური ინფორმაციით, "პირამიდამ ოზურგეთში სხვადასხვა დროს ათი მილიონი ლარის ღირებულების პროექტი "განახორციელა.

ამ ეტაპზე ის რამდენიმე მილიონიან პროექტს-ტროტუარების რეაბილიტაცია და სხვა-ახორციელებდა.

"პირამიდას" გაქცევამდე, ასევე არაოფიციალურად ვრცელდებოდა ინფორმაცია, რომ ქალაქ ოზურგეთის მერია, კომპანიას დარჩენილი თანხის ჩარიცხვაზე უარს ეუბნებოდა და მისგან ტენდერით გათვალისწინებული სამუშაოების შესრულების მყარ გარანტიებს ითხოვდა, თუმცა, ზედა სახელისუფლებო ეშელონებიდან "შემომავალმა" ზარმა, ეს პრობლემა "მოაგვარა" და "პირამიდამ დარჩენილი 380 ათასი ლარი უპრობლემოდ მიიღო, რის შემდეგაც, უკვალოდ გაქრა.

არაოფიციალური ინფორმაციით, ზარის ავოტრმა "პირამიდასაგან" ქრთამის სახით ერთჯერადად 50 ათასი ლარი მიიღო.

რაც შეეხება ქალაქ ოზურგეთს, მას ხელმეორე ტენდერის გამოცხადება მოუწევს აღნიშნული სამუშაოების დასასრულებლად, თუმცა ვინაიდან და რადგანაც "პირამიდას" ოფიციალურად, ქონების სახით არაფერი აბადია, მერიას თანხის მოძიებაც თავიდან მოუწევს.

თეა იოსელიანი - გურია