მუხურაში თოვლის საფარმა 5 მეტრს გადააჭარბა - გამგებელმა კი ტრაქტორი დაკარგა

საზოგადოება - 14:18, 03 Feb, 2017

21185

ტყიბულის რაიონის სოფელ მუხურაში კვლავ დიდთოვლობაა. ტყიბულის მუნიციპალიტეტიდან მიღებული ინფორმაციით, მუხურა -ტყიბულის საავტომობილო გზა წლების განმავლობაში, ზამთრის მკაცრი კლიმატური პირობების გამო, 3-დან 5 თვის განმავლობაში ჩაკეტილი იყო, წელს კი ადგილობრივები თერჯოლის მუნიციპალიტეტიდან შემოვლითი გზით სარგებლობენ. ეს ალტერნატიული გზა რამდენიმე ათეული წელი არ ფუნქციონირებდა. მისი რეაბილიტაცია გასულ წელს განხორციელდა, რაც დიდთოვლობის პერიოდში მოსახლეობას რაიონულ ცენტრებთან დაკავშირების შესაძლებლობას აძლევს.

ამჟამად თოვლის საფარმა სოფელ მუხურაში 2 მეტრს მიაღწია, ხოლო მუხურის მთაზე 5 მეტრს გადააჭარბა. სოფელში მედიკამენტებისა და საკვები პროდუქტების დეფიციტი არ არის.

პრობლემას ის ემატება, რომ მუხურა გამგებელმა ტრაქტორი დაკარგა. ზაზა ყვავაძემ ის ერთადერთი ტრაქტორი უნდა მოძებნოს, რომელიც თოვლში დაიკარა და რომელის რთული მეტეოროლოგიური პირობების გამო, სოფელში გზის გაწმენდის ერთადერთი საშუალებაა.

ადგილობრივების ინფორმაციით, მუხურას გამგებელი და სხვა სამსახურების წარმომადგენლები, ტრაქტორით გზების გაწმენდას ერთი კვირის წინ შეეცადნენ. შეღამებისას ტრაქტორში საწვავი გამოილია და ის გზაზევე დატოვეს. ტრაქტორს ვერავინ მიაკვლია, რადგან მძიმე ტექნიკა ნამქერისაგან ამ დრომდე მთლიანად დაფარულია.

როდის შეძლებს ადგილობრივი თვითმმართველობა როგორც ცენტრთან დამაკავშირებელი, ისე სოფლის შიდა გზების გაწმენდას, უცნობია.