„იმედია, ქურდი და ყაჩაღი კი არ იქნება უცხოური მედიის ყურადღების ცენტრში, არამედ კეთილშობილი ინტელიგენტი“

საზოგადოება - 10:45, 03 Feb, 2017

2845

„გამგზავრებამდე და იქ ყოფნის დროსაც ნუ დაგვავიწყდება რომ ჩვენ სულხან საბას ქვეყნიდან ვართ,“ - წერს ჟურნალისტი და ხელოვნებათმცოდნე კახი ლაზარიშვილი ვიზალიბერალიზაციასთან დაკავშირებით და ევროპაში გამგზავრების მსურველებს შემდეგ მესიჯს უგზავნის.

კახი ლაზარიშვილი: "საქართველოს მოქალაქეები, მთავრობისგან განსხვავებით, იმსახურებენ ევროპაში უვიზო მიმოსვლას" - განაცხადა იაცეკ სარიუშ-ვოლსკიმ. მე, ძალიან გამიხარდება, თუ ევროპასთან ურთიერთობის გამარტივება ხელს შეუწყობს ჩვენი ქვეყნების დამეგობრებას ისე, რომ ევროპაში ჩასული საქართველოს მოქალაქე ევროპელისთვის მისაბაძი იყოს და არა საშიში კრიმინალი, რომელიც იქ მარკეტებში ქურდობითა და ბინების ძარცვით ირჩენს თავს.
ამ ამბით ბევრი გახარებული და აღტკინებული ადამიანის კომენტარი წავიკითხე, რომელთა უმრავლესობასაც ევროპაში უვიზოდ მიმოსვლა ალბათ იმიტომ კი არ გაუხარდა, რომ იქ ჩავიდეს და ეზიაროს ევროპულ კულტურას, არამედ იმის იმედი გაუჩნდათ, რომ გაექცნენ დღევანდელ რეალობას და თავი დააღწიონ დუხჭირ ცხოვრებას იმ მიზნით, რომ იქ დასაქმდებიან...
ერთი სიტყვით, ევროპა მზადაა მასპინძლობისთვის, კარი გაგვიღო და გველოდება ... მაგრამ იქ, არავის სჭირდება თბილი, მაგრამ მოსაწყენი ერთფეროვნების ქვეყნიდან გაქცეული თავშესაფარ მაძიებელი, დაბეჩავებული, წელში მოხრილი, მშიერი და გაუბედურებული ადამიანი...
ევროპა ელოდება სწავლას მოწყურებულ ახალგაზრდებს, ნიჭიერ ხელოვანებს, რომლებსაც ფართე ასპარეზს მისცემს, თვითონაც ისარგებლებს, მაგრამ ჩვენც დაგვეხმარება ქართული ნიჭის ინტეგრირებაში დასავლეთში, ელოდება საქართველოს ყველა იმ მოქალაქეს, ვინც ტურისტის სტატუსით ეწვევა ცივილიზებულ, კანონმორჩილ, მოწესრიგებულ, კულტურულ, დემოკრატიულ სახელმწიფოებს, რომ ეზიარონ დასავლურ კულტურას, ნახონ, დაათვალიეროს მუზეუმები, საგამოფენო დარბაზები, თვალი შეავლონ კულტურულ-არქიტექტურულ ძეგლებს, ესტუმრონ თეატრებს და სხვა...
გამგზავრებამდე და იქ ყოფნის დროსაც ნუ დაგვავიწყდება რომ ჩვენ სულხან საბას ქვეყნიდან ვართ, რომელიც ევროპულ ოჯახთან დაახლოებას (ვინმეს რომ არ ეწყინოს კარგი ბატონო ვიტყვი, რომ დაბრუნებას) საუკუნეების წინ ცდილობდა მოესინჯა ნიადაგი დასავლეთ ევროპასთან პოლიტიკური კავშირისათვის და ამ მიზნით ეწვია იგი საფრანგეთის მეფეს ლუი XIV-ს და რომის პაპს კლიმენტი XI-ს.
სამწუხაროა მაგრამ რეალობაა, რომ ჩვენ საერთაშორისო მნიშვნელობის მუსიკოსები, მხატვრები, სპორტსმენები, ტექნიკური თუ ჰუმანიტარული დარგის მოღვაწეები უფრო ნაკლები გვყოლია, ვიდრე საერთაშორისო მნიშვნელობის ქურდები- რომლთა ევროპულ “მოღვაწეობაზე“ მსოფლიოს წამყვანი ტელევიზიები უკვე ხშირად გადმოსცემენ, თუ სად რა მოიპარეს, ვინ მოკლეს ვინ გაძარცვეს დააყაჩაღეს....
ჰოდა იმედია ამის შემდეგ ქურდი და ყაჩაღი კი არ იქნება უცხოური მედიის ყურადღების ცენტრში, არამედ კეთილშობილი ინტელიგენტი. ყველამ ერთად ვისურვოთ, რომ აღიარებულ ქართველი ხელოვნებისა და მეცნიერების მოღვაწეებთან ერთად, საქართველოდან ჩასული ტურისტების მაღალ ზნეობრიობაზე, შეგნებასა და კულტურულ თვისებებზე ისაუბრონ ევროპელებმა... ვისურვოთ, რომ აქედან ჩასული ბოლოკისა და სიგარეტის ქურდებმა იკლოს და ევროპის ქუჩებში ღირსეული, განათლებული კულტურული, ჩვენი ქვეყნის ისტორიითა და ტრადიციებით ამაყი ადამიანები გამოჩდნენ“....