ლანჩხუთის მუნიციპალიტეტში, ისევ როგორც მთლიანად გურიაში დღეს დილიდან გადაუღებლად თოვს.

დიდთოვლობის გამო პრობლემები შეექმნა ძირითადად სოფლის მოსახლეობას. რამდენიმე სოფელში, დაზიანებული ელექტროსადენების გამო, შუქის მიწოდება შეზღუდვით ხდება.

როგორც სოფელ ჩოჩხათიდან გვაცნობეს, თემში შემავალ სოფლებში დილიდან არა აქვთ შუქი და გაუწმენდავია შიდა გზები. თოვლის საფარი კი, დაახლოებით 60 სანტიმეტრს აღწევს: "არც შუქი გვაქვს, არც გზაა გაწმენდილი"-გვეუბნებიან ადგილობრივები.

ჩოჩხათის მსგავსად შეზღუდვით მიეწოდება ელექტროენერგია მამათს, პრობლმები აქვთ სუფსაშიც.
ლანჩხუთის გამგებლის, ზაზა ურუშაძის თქმით, ქალაქის ცენტრალურ ნაწილში გზები აქტიურად იქმინდება და გადდადგილების პრობლემა არ არის. შედარებით მაღალმთიან სოფლებში კი, მძიმე ტექნიკა ამ წუთებშიც მუშაობს. რამდენიმე წუთის წინ ელექტროენერგია გამოერთო მამათს, სადაც ბრიგადა უკვე გასულია და მიმდინარეობს აღდგენითი სამუშაოები.

რაც შეეხება ჩოჩხათს, ურუსაძის თქმით, იქ ნაძვის ხე წაიქცა, რამაც ელექტროგადამცემი ხაზები დააზიანა და მალე იქაც დაიწყება აღდგენითი სამუშაოები: "ველაპარაკე "ენერგო პრო ჯორჯიას" ხელმძღვანელობას და მითხრეს, რომ ჩოჩხათშიც მალე გავა ბრიგადა. ამ ეტაპზე მუშაობა დაწყებულია მამათში. გზები იწმინდება მაღალმთიან სოფლებში, მათ შორის ჩოჩხათშიც. უბრალოდ ყველა მიმართულებით ერთდროულად ვერ ხერხდება გზების გაწმენდა და ეტაპობრივად მიდის სამუშაოები"-გვითხრა ურუშაძემ.