"America has made it’s choice" – „სკანდალი“ და მისი მთავარი გმირი ოლივია პოუპი ტელეეკრანებს დაუბრუნდნენ. გუშინ abc-ის ეთერში სერიალის მეექვსე სეზონის პირველი სერია იხილა მაყურებელმა.

სერიალის ახალი სეზონის მოლოდინი აშშ-ში ნოემბრის არჩევნებამდე გახლდათ ისეთი, რომ ამერიკის პრეზიდენტი მელი გრანტი გახდებოდა, თუმცა, მას შემდეგ, რაც არჩევნებში დონალდ ტრამპმა გაიმარჯვა, სერიალის ახალი სეზონის პრეზენტაციაც გადაიდო.

თუმცა, საზოგადოებამ გუშინ ახალი ეპიზოდი იხილა, სადაც მოვლენები საკმაოდ უცნაურად ვითარდება. „სკანდალი“ იმიტომ იყო საზოგადოებისთვის განსაკუთრებით მისაღები, რომ რეალურ ისტორიებზე აწყობილი სცენები განსაკუთრებულ ინტერესს აღძრავდა. აშშ-ის პრეზიდენტი, პირველი ლედი, თეთრი სახლი, პრეზიდენტის ადმინისტრაცია და მის გარშემო მიმდინარე მოვლენები თავისი დეტალებით. როგორი იქნება ახალი სეზონი?

სერია რა თქმა უნდა არჩევნების შედეგების მოლოდინით იწყება, სადაც გაირკვევა, რომ არჩევნებში მელი გრანტი დამარცხდა, 45-ე პრეზიდენტი კი ფრენკ ვარგასი გახდა. მელი ვარგასს გამარჯვებას მიულოცავს, ყოველთვის გამარჯვებული ოლივია, მაგრამ ამჯერად დამარცხებულის პოზიციიდან, მელისთან ერთად შამპანურს მიირთმევს, რა დროსაც ცნობილი გახდება, რომ ამერიკის შეერთებული შტატების ახლადარჩეულ პრეზიდენტს ესროლეს.

თუ როგორ განვითარდება შემდგომ მოვლენები, ამას უახლოეს საათებში იხილავთ, მას შემდეგ რაც ამა თუ იმ ვებ-გვერდზე ახალი სერია დაიდება.

შესაძლოა იმედიც გაგიცრუვდეთ იმ ილუზიის გამო, რაც რეალობას ძალიან არის მოწყვეტილი და რამაც „სკანდალი“ ჩვეულებრივ დრამად აქცია, შესაძლოა ეს „ტყუილი“ მოგეწონოთ კიდეც. ეს თქვენი გადასაწყვეტია!