„დანგრეულია მრავალსაუკუნოვანი სვანური კოშკები და უძველესი საცხოვრებელი სახლები, ნადგურდება შუასაუკუნეებში აშენებული ხელოვნების ძეგლები “- ისტორიული ადიშისთვის შველას ფრანგი ფოტოხელოვანი ითხოვს...

ეს ის ადიშია, რომლის სილამაზითა და სიძველით ჯერ კიდევ მეცხრამეტე საუკუნის 90-იან წლებში, იტალიელი ფოტოგრაფი და მთამსვლელი ვიტორია სელა მოიხიბლა. მაშინ იტალიელმა ფოტოგრაფმა ადიშში 14 კოშკი დააფიქსირა.

დღეს ადიშს ისევ უცხოელი ფოტოგრაფი სტუმრობს. ამჯერად საფრანგეთიდან. ფრენსის პრიმერსკი ისევე როგორც საუკუნეების წინ ვიტორია სელა სვანეთის მთებში ჩაკარგულმა ულამაზესმა სოფელმა აღაფრთოვანა, თუმცა, იტალიელი ფოტოგრაფისგან განსხვავებით საოცარი ნაგებობების ნაცვლად მას დანგრეული კოშკების გადაღება უხდება.

სოფელში სკოლის შენობის აღდგენასთან დაკავშირებით განცხადება რამდენიმე თვის წინ დაიწერა, თხოვნით მიმართეს განათლების მინისტრს ალექსანდრე ჯეჯელავას. სოფლის სკოლაზე ზრუნვა ელისაბედ ქალდანმა ითავა. როგორც მისგან შევიტყვეთ განათლების სამინისტროდან პასუხს დღემდე ელოდებიან.

ელისაბედ ქალდანი: „სკოლის არქონა რათქმაუნდა ძალიან დიდ პრობლემას უქმნის სოფელს და ჩვენს მომავალს. ბავშვებს არა აქვთ ზოგადი განთლების მიღების საშუალება. სკოლა 2002 წელს დაიხურა,რადგან სოფელი დაიცალა... ახლა პირიქით არის, ნელ-ნელა ემატება სოფელს ხალხი, ბევრს უნდა დაბრუნება. ბავშვებს სოფელ იფარში (მანძილი იფარამდე 11 კმ-ია) უწევთ სიარული.. ზამთარში უგზოობის გამო კვირაობით ვერ მიდიან სკოლაში...

ჩვენი მიზანია, ჩვენთან იყოს საგანმანათლებლო ცენტრი, სააზროვნო სივრცე... 3 თვის წინ ონლაინ განცხადებით მივმართეთ განათლების სამინისტროს, ჯერ არავითარი პასუხი არ ყოფილა. თუმცა, გვჯერა, რომ დაინტერესდებიან ამ საკითხით და მოგვხედავენ.

სკოლის აღდგენა - ეს მთელი სოფლის მოთხოვნაა და არა მარტო მთელი სოფლის... ეს უნდა იყოს ერის მოთხოვნაც, რადგან ჩვენს ქვეყანას დღეს ყველაზე მეტად სოფელს დაბრუნებული მოსახლეობა და განათლებული მომავალი თაობა სჭირდება“.