ცოცხალი გარდაცვლილი - სასწრაფო დახმარების ცენტრი განცხადებას ავრცელებს

საზოგადოება - 10:42, 23 Jan, 2017

18491

რეგიონული სასწრაფო სამედიცინო დახმარების ცენტრი უარყოფს. გავრცელებულ ინფორმაციას - ქუთაისში, სასწრაფო სამედიცინო დახმარების ეკიპაჟის მიერ ცოცხალი ადამიანის გარდაცვლილად დააფიქსირების შესახებ. ამასთან დაკაშირებით ცენტრი განცხადებას ავრცელებს და დეტალურად აღწერს აღნიშნული მისამართიდან შემოსული გამოძახების ზარებსა და სასწრაფო დახმარების ცენტრის მიერ გაწეულ სამუშაოს.

რეგიონულ სასწრაფო სამედიცინო დახმარების ცენტრში გამოძახება 21:03 საათზე დაფიქსირდა. ეკიპაჟი გავიდა დაუყოვნებლივ გამოძახების ადგილზე - ქუთაისში, ფხაკაძის ქუჩაზე და მივიდა 21:18 საათზე. ექიმმა შეაფასა მდგომარეობა და დააფიქსირა გარდაცვლილი მამაკაცი, 61 წლის. 23:31 საათზე, იმავე მისამართიდან, პაციენტის მდგომარეობის გადამოწმების მოტივით გამოძახება კვლავ დაფიქსირდა რეგიონული სასწრაფო სამედიცინო დახმარების ცენტრში. ეკიპაჟი ადგილზე მივიდა 23:40 საათზე. დამატებით ადგილზე გავიდა ის ეკიპაჟი, რომელმაც თავდაპირველად დააფიქსირა პაციენტის გარდაცვალების ფაქტი. ადგილზე არსებული მდგომარეობიდან გამომდინარე, სასწრაფო სამედიცინო დახმარების ექიმი მოერიდა სიტუაციის ესკალაციას, გარდაცვლილი გადაიყვანა ქუთაისის რეგიონალურ კლინიკურ საავამდყოფოში, სადაც შედგა ოქმი 61 წლის მამაკაცის გარდაცვალების შესახებ. გავრცელებული ინფორმაცია, თითქოს პაციენტს თავდაპირველად არასწორად დაუდგინდა გარდაცვალების ფაქტი, შემდგომ კი საავადმყოფოში მთელი ღამის განმავლობაში უტარდებოდა სამედიცინო დახმარება, სიმართლეს არ შეესაბამება.