,,ფეისბუქზე მწერდნენ, ადგილი ჰქონდა აგრესიას და მუქარას“

,,ფეისბუქზე მწერდნენ, ადგილი ჰქონდა აგრესიას და მუქარას“ - რას უკავშირდება პანკისის ინციდენტი

საზოგადოება - 23:16, 03 Jan, 2017

8112

პანკისში რეგიონული განვითარების ცენტრის ოფისის დაწვის მცდელობასთან ადგილობრივივი ისლამისტების კავშირს არ გამორიცხავს ორგანიზაციის ხელმძღვანელი. არსებული ინფორმაციით, იზა ბექაურს სოფლის დაჯგუფება ქალთა საკითხებთან დაკავშირებული პროექტის გამო დაპირისპირდა. მათთვის მიუღებელი იყო ქალთა ჩართულობა და აქტივობები კულტურულ და საზოგადოებრივ საქმიანობაში, რიც გამოც იზა ბექაურს ფეისბუქზე მუქარის წერილიც მიწერეს. მომხდარს ,,ნიუპოსტთან“ ორგანიზაციის ხელმძღვანელი ადასტურებს.

,,ჩვენი საქმიანობიდან გამომდინარე ადგილი ჰქონდა აგრესიას და მუქარას. ჩვენ ვმუშაობთ ქალთა საკითხებზე, გვქონდა კულტურული აქტივობები და ეს იყო მიუღებელი ადგილობრივებისთვის. ფესიბუქზე მწერდნენ და მეუბნებოდნენ, რომ მათთვის მიუღებელი იყო ჩვენი საქმიანობა“ - აცხადებს ბექაური.

რამდენად აქვს კავშირი მანამდე განხორციელებულ მუქარას შენობის დაწვს მცდელობასთან, იზა ბექაური არ გამორიცხავს, ,,კონკრეტულად, ვინმესთან მე დაპირისპირება არ მქონია, გარდა ამ ერთი ფაქტისა და ვფიქრობ აქედან გამომდინარე მოხდა“ - აცხადებს ბექაური. მისი თქმით, ორგანიზაცია ინციდენტის გამო აქტიურად თანამშრომლობს სამართალდამცავ უწყებასთან.

პანკისში რეგიონალური განვითარების ფონდის შენობას ცეცხლი წაუკიდეს. შემთხვევა დღეს გვიან საღამოს მოხდა.

შსს-ის ინფორმაციით, საქმე სისხლის სამრთლის კოდექსის 187-ე მუხლით არის აღძრული.