გაგრძელდება თუ არა სერიალები "რუსთავი2"-ზე - პროდიუსერი ფინანსურ პრობლემებზე საუბრობს

საზოგადოება - 11:40, 03 Jan, 2017

43400

„ფორმულა კრეატივის“ წარმომადგენელი და პოპულარული სერიალების „ხელოვნური სუნთქვისა“ და „ჩემი ცოლის დაქალების“ პროდიუსერის ირაკლი საღინაძის განცხადებით, „ხელოვნური სუნთქვის“ შეწყვეტის მიზეზი ფინანსური პრობლემები გახდა, რომელიც სარეკლამო ბაზარს, რუსთავი 2-ს და შესაბამისად „ფორმულა კრეატივსაც“ შეეხო. ამის შესახებ ირაკლი საღინაძემ „პრაიმტაიმთან“ ისაუბრა:

“არხის ფინანსური პრობლემები, მთლიანობაში ქვეყანაში შექმნილი ეკონომიკური პრობლემები, რაც აისახა სარეკლამო ბაზრის ვარდნაში და შესაბამისად ტელევიზიების და სატელევიზიო სივრცეში მოქმედ კომპანიებზე. სამწუხაროდ ფინასური პრობლემების გამო, იძულებულნი ვართ შევაჩეროთ “ხელოვნური სუნთქვა” და დაველოდოთ უკეთეს პერიოდს, როდესაც შესაძლებელი იქნება ამ პროექტის დაფინანსება. სამწუხაროდ ეს სერიალი ჯერ სტარტის ეტაპზეა და პირველი ორი სეზონი საკმარისი არ აღმოჩნდა იმისათვის, რომ პროექტი თვითკმარი და კომერციულად გამართლებული გამხდარიყო, სამწუხაროდ დღეს, არც რუსთავი 2-ს და არც “ფორმულა კრეატივს” არ აქვს საშუალება დოტაციური პროექტი აწარმოოს.“- განაცხადა საღინაძემ, მისი თქმით განსხვავებით „ხელოვნური სუნთქვისა“ სერიალი „ჩემი ცოლის დაქალები“ თვითკმარი პროექტია და აქვს საშუალება შეინახოს საკუთარი თავი, შესაბამისად მას შეწყვეტის საფრთხე არ ემუქრება.