ირაკლი კობახიძემ და პარლამენტის წევრებმა ბოდბისხევის პანსიონატის ხანდაზმულებს შობა-ახალი წელი მიულოცეს

საზოგადოება - 12:15, 01 Jan, 2017

2829

პარლამენტის თავმჯდომარე, ირაკლი კობახიძე, შვილთან ერთად სიღნაღის მუნიციპალიტეტის სოფელ ბოდბისხევში მდებარე პანსიონატს „უზრუნველი სიბერე“ ესტუმრა.

ირაკლი კობახიძემ და დეპუტატებმა პანსიონატის ბენეფიციარებს შობა-ახალი წელი მიულოცეს და პარლამენტის სახელით პირველადი მოხმარების ნივთები, საკვები პროდუქტები, ტკბილეული და საახალწლო საჩუქრები გადასცეს.

„დღეს ვესტუმრეთ ბოდბისხევს, მოვიკითხეთ მოხუცები და ძალიან ძვირფას და საყვარელ ადამიანებს მივულოცეთ შობა-ახალი წელი. მინდა მივულოცო სრულიად საქართველოს, საქართველოს მოსახლეობას შობა-ახალი წელი და ვუსურვო წარმატებები, ბედნიერება და ყოველივე საუკეთესო მომავალ 2017 წელს“, - განაცხადა ირაკლი კობახიძემ ხანდაზმულთა პანსიონატში სტუმრობისას.

ბოდბისხევის პანსიონატში „უზრუნველი სიბერე“, 2013 წელს დაარსდა და დღეისათვის აქ 10 ხანდაზმული ცხოვრობს. პანსიონატის დამფუძნებელმა, ლეილა ბოქოლიშვილმა და ბენეფიციარებმა მადლობა გადაუხადეს პარლამენტის თავმჯდომარეს და პარლამენტის წევრებს სტუმრობისთვის და საახალწლო საჩუქრებისთვის.

ბოდბისხევში პარლამენტის თავმჯდომარესთან ერთად იმყოფებოდნენ განათლების, მეცნიერებისა და კულტურის კომიტეტის თავმჯდომარე მარიამ ჯაში, სპორტისა და ახალგაზრდულ საქმეთა კომიტეტის თავმჯდომარე მიხეილ ყაველაშვილი, პარლამენტის აპარატის უფროსი ანრი ოხანაშვილი და პარლამენტის თავმჯდომარის კაბინეტის უფროსი ნიკოლოზ სამხარაძე.