„აუდიტორია 115“-ის წევრები თსუ-ს მე-6 კორპუსის პიკეტირებას სადღესასწაულო დღეებშიც გააგრძელებენ

საზოგადოება - 13:03, 30 Dec, 2016

1711

„აუდიტორია 115“-ის წევრების განცხადებით, ისინი თბილისის სახელმწიფო უნივერსიტეტის მე-6 კორპუსის პიკეტირებას სადღესასწაულო დღეებშიც აპირებენ.
„აუდიტორია 115“-ის წევრებმა დღეს პრესკონფერენცია გამართეს, სადაც ლევან ლორთქიფანიძემ აღნიშნა, საქართველოს პარლამენტის განათლების კომიტეტის თავმჯდომარემ პირობა დაარღვია, რომელიც „უმაღლესი განათლების შესახებ“ კანონში ცვლილების ინიცირებას ახალ წლამდე დაარეგისტრირებას დაჰპირდა სტუდენტებს. თუმცა ეს პირობა მათგან არ შესრულდა, რის გამოც, ისინი მე-6 კორპუსის პიკეტირებას აგრძელებენ.

„ განათლების კომიტეტმა უარი თქვა კანონში ცვლილების ინიცირების დარეგისტრირებაზეც კი, არათუ კანონში ცვლილების განხორციელებაზე. შესაბამისად, განათლების კომიტეტის თავმჯდომარემ და სხვებმა ჩვენ გაგვწირეს იმისთვის, რომ გავაგრძელოთ მე-6 კორპუსის პიკეტირება, ვიდრე კანონპროექტი არ დარეგისტრირდება. განათლების კომიტეტის წარმომადგენლები ჩვენ გვეუბნებიან, რომ კანონპროექტის დარეგისტრირება შეიძლება მოხდეს გაზაფხულის დასაწყისში. ისინი არც ერთ ჩვენს მოთხოვნას არ ითვალისწინებენ. კანონის რეგისტრაციაზეც უარს გვეუბნებიან და ერთადერთი გზა, დაგვრჩა გავაგრძელოთ ამ კორპუსის პიკეტირება. მოვუწოდებთ საზოგადოებას, სადღესასწაულო დღეებში, როდესაც მე-6 კორპუსში ათეულობით სტუდენტი იქნება, რა ფორმითაც შეძლებენ, გამოგვიცხადონ სოლიდარობა“, - განაცხადა ლევან ლორთქიძანიძემ.