ნოდარ ხადურმა მონაწილეობა მიიღო საერთაშორისო კონფერენციაში

ბიზნესი & ეკონომიკა - 16:43, 22 May, 2013

694

"კავკასიის და ცენტრალური აზიის ქვეყნების გარდამავალი პერიოდი და სამომავლო პერსპექტივები," რომელიც საერთაშორისო სავალუტო ფონდის, ევროპის რეკონსტრუქციისა და განვითარების ბანკის, შვეიცარიის კონფედერაციის ეკონომიკურ საქმეთა სახელმწიფო სამდივნოს, ყირგიზეთის რესპუბლიკის მთავრობისა და ცენტრალური ბანკის ორგანიზებით ქ. ბიშკეკში გაიმართა.

კონფერენციის მონაწილეებმა განიხილეს კავკასიისა და ცენტრალური აზიის ქვეყნებში გარდამავალი პერიოდი, მათი უმთავრესი ეკონომიკური პრიორიტეტები და გამოწვევები.

კონფერენციის ფარგლებში საქართველოს ფინანსთა მინისტრი ნოდარ ხადური შეხვდა მსოფლიო ბანკის რეგიონალურ დირექტორებს, საროჯ კუმარ ჯას და ჰენრი კერალის, ასევე, შუა აღმოსავლეთისა და ცენტრალური აზიის დეპარტამენტის სამმართველოს უფროსის მოადგილეს, ჯონათან დანს.

საქართველოს ფინანსთა მინისტრი ასევე შეხვდა ყირგიზეთის რესპუბლიკის ფინანსთა მინისტრს ოლგა ლავროვას. შეხვედრაზე აღინიშნა, რომ ყირგიზეთისთვის მნიშვნელოვანია სახელმწიფო ფინანსების მართვის სფეროში საქართველოს გამოცდილების გაზიარება. შეხვედრის შემდეგ ორივე ქვეყნის ფინანსთა მინისტრმა ხელი მოაწერა საქართველოს ფინანსთა სამინისტროსა და ყირგიზეთის რესპუბლიკის ფინანსთა სამინისტროს შორის ურთიერთგაგების მემორანდუმს თანამშრომლობის შესახებ. დოკუმენტი ითვალისწინებს ინფორმაციის გაცვლას და გამოცდილების გაზიარებას საბიუჯეტო, ფისკალურ, საინვესტიციო პოლიტიკასთან დაკავშირებით, ასევე სასწავლო პროგრამებისა და სემინარების ორგანიზებას ყირგიზეთის ოფიციალური პირებისთვის და სხვა.

ფინანსთა მინისტრს ორმხრივი შეხვედრები ჰქონდა ყირგიზეთის ეკონომიკის მინისტრთან ტემირ სარიევთან, ცენტრალური ბანკის მმართველთან ზინა ასანკოევასთან, მთავრობისა და პარლამენტის წევრებთან. შეხვედრებზე განიხილეს საქართველოსა და ყირგიზეთის რესპუბლიკის სახელმწიფო უწყებებს შორის თანამშრომლობის საკითხები. მოლაპარაკებებისას, კიდევ ერთხელ ხაზგასმით აღინიშნა ორ ქვეყანას შორის ეკონომიკური ურთიერთობების ინტენციურად განვითარების აუცილებლობა, დადასტურდა ყირგიზეთს ხელისუფლების მხარდაჭერა საქართველოს ხელისუფლებისა და ქვეყანაში მიმდინარე ეკონომიკური პოლიტიკისადმი.

საერთაშორისო კონფერენციის ფარგლებში საქართველოს ფინანსთა მინისტრმა ნოდარ ხადურმა კიდევ რამდენიმე შეხვედრა გამართა, მათ შორის, გაეროს უნივერსიტეტის რექტორის უფროს მრჩეველთან და "თჰე Mაინიცჰი Nეწსპაპერს"-ის აზიის საქმეთა კვლევის საბჭოს მრჩეველთან, ტეცუჯი ტანაკასთან (თეტსუჯი თანაკა), ფინეთის ბანკის მრჩეველთან, დამოუკიდებელ ექსპერტთან მარეკ დაბროვსკისთან (Mარეკ Dაბროწსკი), სერბეთის რესპუბლიკის ყოფილ ვიცე-პრემიერთან და ამჟამად პარლამენტის წევრ ბოჟიდარ დელიჩთან (Bოზიდარ Dელიც).