"შს მინისტრი თანამშრომლების სამსახურებიდან ,,ჰარმონიული“ განთავისუფლებით არის დაკავებული"- სდლ -ს განცხადება

საზოგადოება - 18:46, 26 Dec, 2016

13817

"სამართალდამცავთა ლიგა" შს სამინისტროს მოქმედ თანამშრომლებს მიმართავს. მათი ინფორმაციით, შესაძლებელია სამართალდამცავებს მათი ნების საწინააღმდეგოდ დააწერინონ განცხადება სამსახურიდან გათავისუფლების მოთხოვნით. ორგანიზაცია მზადყოფნას გამოთქვამს აღნიშნულ საკითხზე კოლეგებს იურიდიული კონსულტაცია გაუწიოს.
"გვინდა მივმართოთ ჩვენს კოლეგებს, პოლიციის თანამშრომლებს, რომლებსაც შექმნილი ვითარებიდან გამომდინარე თქვენი ნების საწინააღმდეგოდ შესაძლოა მოგიხდეთ განცხადების დაწერა სამსახურიდან დათხოვნის შესახებ უარი განაცხადოთ პატაკის დაწერაზე. ჩვენი ორგანიზაცია მზად არის აღნიშნულ საკითხზე გაგიწიოთ იურიდიული კონსულტაცია.
საქართველოში გაუარესებული კრიმინოგენული ვითარების ფონზე შინაგან საქმეთა მინისტრის გაუაზრებელმა განცხადებებმა მდგომარეობა თავად შინაგან საქმეთა სამინისტროში დაძაბა.
პოლიციის ოფიცრებს დაუცველობის და არასტაბილურობის განცდა გაუღრმავა. მინისტრი, რომელიც საკუთარ თანამშრომლებს ,,ბალასტს“ ანუ ზედმეტ ტვირთს უწოდებს და ამ ,,ტვირთისგან“ გათავისუფლებას ცდილობს , ბუნებრივია პოლიციელების ინტერესებს ვერ დაიცავს. აღნიშნულს ყველა რიგითი ოფიცერი აცნობიერებს. საერთოდ კატასტროფული აღმოჩნდა შს მინისტრის განცხადება ე.წ. ,,ოპტიმიზაციასთან“ და ,,ბალასტის“ მოცილებასათან დაკავშირებით. ამ პროცესების რეგულირება და გასათავისუფლებელ თანამშრომელთა სიების შედგენა იმ დეპარტამენტებისა და სამხარეო მთავარი სამმართველოს უფროსებს დაევალა, რომლებსაც როგორც თავად პოლიციელები აცხადებენ, ხშირ შემთხვევაში ,,ცოცხალი დამნაშავე“ ნანახი არც კი ჰყავთ. საინტერესოა, რომ მინისტრი იმ პოლიციელების გაყრას აანონსებს, რომლებმაც პოლიციაში ,,თავისი რესურსი“ ამოწურეს და მათ რეალიზებას სხვა სარბიელზე სთავაზობს. ამ ტრაგიკულ მდგომარეობას ამძიმებს სახელმწიფოში შექმნილი მძიმე ეკონომიკური და სავალუტო კრიზისი, რაც პირდაპირ აისახება პოლიციელთა და პოლიციელთა ოჯახების ქონებრივ ყოფაზე. ნაცვლად იმისა შს მინისტრმა კურსი აიღოს რიგით ოფიცერთა ეკონომიკური და სოცილური მდგომარეობის გაუმჯობესებაზე, ის საკუთარი თანამშრომლების სამსახურებიდან ,,ჰარმონიული“ განთავისუფლებით არის დაკავებული, რასაც არა ერთი უცხო სიტყვის დაუფიქრებლად წამოსროლით ნიღბავს"- აღნიშნულია განცხადებაში.