ნაძალადევის რაიონში, თემქის მე-4 მ/რ-ს N154 სკოლასთან „ჯორჯიან უოთერ ენდ ფაუერის” თუჯის 900მმ-იანი მაგისტრალური წყალსადენის ქსელი დაზიანდა. „ჯორჯიან უოთერ ენდ ფაუერის” ინფორმაციით, ადგილზე მობილიზებულია კომპანიის სამუშაო ჯგუფი და აღდგენითი სამუშაოები აქტიურად გრძელდება. როგორც კომპანიაში განმარტავენ, მაგისტრალური ქსელის დაზიანებული მონაკვეთი 3 მეტრის სიღრმეში, ქვაბულშია მოქცეული, რაც სამუშაო პროცესს ართულებს.

”სამუშაოების წარმოება მაგისტრალური ქსელის წყლისგან დაცლას მოითხოვს. აღნიშნულთან დაკავშირებით დღეს, 25 დეკემბერს 21:00 საათამდე წყალმომარაგება შეზღუდული აქვს ნაძალადევის რაიონში:

სარაჯიშვილის, გურამიშვილის გამზირს და მიმდებარე ქუჩებს, ანდრონიკაშვილის მე-2 და მე-3 შესახვევებს, ფეიქრების და მიმდებარე ქუჩებს, თემქის 4 მ/რ და 1 მ/რ-ის ნაწილს, თემქის 11 მ/რაიონის კვარტლებს. ასევე დადიანის 2 მ/რ-ს, ჩარგლის, იმერეთის, სააკაძის, ურიდიას და მიმდებარე ქუჩებს.

წყალმომარაგების აღდგენამდე კომპანია მოსახლეობას წყალს ცისტერნებით მიაწვდის.

წყალმომარაგების შეწყვეტისა და აღდგენის შესახებ ინფორმაცია „ჯორჯიან უოთერ ენდ ფაუერმა“ აბონენტებს წინასწარ, SMS-შეტყობინების სახით მიაწოდა. დეტალური ინფორმაციის მოძიება შესაძლებელია კომპანიის ცხელი ხაზის - 2 93 11 11, ფეისბუქისა და ვებგვერდის მეშვეობით - http://www.gwp.ge/ka/dagegmili.

„ჯორჯიან უოთერ ენდ ფაუერი“ დისკომფორტისთვის ბოდიშს უხდის მომხმარებლებს და შეეცდება, სამუშაოების ჩატარება მოკლე დროში დაასრულოს”, -ნათქვამია ინფორმაციაში.