ილია II მახათას მთაზე პარაკლისს გადაიხდის და ბავშვებს დალოცავს

საზოგადოება - 09:57, 17 Dec, 2016

7063

სრულიად საქართველოს კათოლიკოს-პატრიარქი, ილია II ბარბარობის დღესასწაულთან დაკავშირებით, მახათას მთაზე პარაკლისს გადაიხდის და ბავშვებს დალოცავს.
როგორც საქართველოს საპატრიარქოს განცხადებაშია აღნიშნული, დღეს პირველად დაირეკება მახათის მთის ღვთისმშობლის ხატის სახელობის ტაძრის ზარები.
საპატრიარქოს ცნობითვე დღესვე საზოგადოება „ივერიისას“ წარდგინება მოხდება, რომელიც ფონდი „ივერიისას“ რეორგანიზაციის შედეგად ჩამოყალიბდა.
„სრულიად საქართველოს კათოლიკოს-პატრიარქის ლოცვა-კურთხევით 2010 წელს დაარსებული ფონდი „ივერიისა“ უკვე მეექვსე წელია მახათას მთაზე ანხორციელებს ივერიის ღვთისმშობლის ხატის სახელობის ტაძრის მშენებლობას. 2015 წლის დეკემბრამდე ფონდს ხელმძღვანელობდა ბატონი პაატა ბურჭულაძე, რომელმაც ბევრი გააკეთა მისი წარმატებით ფუნქციონირებისათვის; მაგრამ მან, პოლიტიკურ პროცესებში ჩართვის გამო, პირადი სურვილით დატოვა ეს ორგანიზაცია. ფონდის ხელმძღვანელობა დაეკისრა ბატონ გიორგი თავაძეს და მოხდა მისი რეორგანიზაცია. იგი გადაკეთდა საზოგადოებად, რომლის დამფუძნებლებიც ჩვენი საზოგადოების ცნობილი წარმომადგენლები არიან. ა.წ. 17 დეკემბერს, ბარბარობა დღეს, მოხდება საზოგადოება „ივერიისას“ წარდგინება მახათას მთაზე. 12:00 საათზე კი უწმინდესი და უნეტარესი სრულიად საქართველოს კათოლიკოს-პატრიარქი ილია II გადაიხდის პარაკლისს, დალოცავს ბავშვებს და სრულიად საქართველოს. ამ დღეს პირველად დაირეკება მახათის მთის ღვთისმშობლის ხატის სახელობის ტაძრის ზარები“, - ნათქვამია განცხადებაში.