დღეს, 15 დეკემბერს, საპატრიარქოში უნიკალური გამოცემის, ქართველთა საუკუნის ტრილოგიის - "ნათელი ქრისტესი. საქართველო" მე-3 ტომის პრეზენტაცია გაიმართა. მესამე ტომის სახელწოდებაა "მზიანი ღამე. პატრიარქი".

პრეზენტაციას სრულიად საქართველოს კათოლიკოს-პატრიარქი ილია მეორე, კულტურის და ძეგლთა დაცვის მინისტრი მიხეილ გიორგაძე, პრეზიდენტის ადმინისტრაციის უფროსი გიორგი აბაშიშვილი და პრეზიდენტის მრჩეველი ფიქრია ჩიხრაძე, "ეროვნულ დემოკრატიული პარტიის" ლიდერი ბაჩუკი ქარდავა და სამეცნიერო-აკადემიური საზოგადოების წარმომადგენლები დაესწრნენ.

ტრილოგიის იდეის ავტორი კათოლიკოს-პატრიარქი, ილია მეორეა, ქართველთა საუკუნის ტრილოგიის პროექტის ავტორი და მთავარი რედაქტორი კი ისტორიის მეცნიერებათა დოქტორი, პროფესორი ნესტან კირთაძე.

"ქალბატონი ნესტან კირთაძე საოცარი ადამიანია. თქვენს გარდა ვერავინ შეძლებდა ამის გამოცემას" - ასე მიმართა საქართველოს პატრიარქმა წიგნის პროექტის ავტორს.

უწმინდესის თქმით, "ტრილოგია გამოხატავს ჩვენს ინტელექტს, ჩვენს პოტენციალს, რა შეუძლია ქართველს გააკეთოს, როგორი დონეა ჩვენი აზროვნების".

"მე მახსენდება აღსაყდრების შემდეგ პირველი დღეები. არაფერი არ გვქონდა ჩვენ. მე მოვიწვიე საპატრიარქოში რამდენიმე მეცნიერი, მივეცი მათ მოსკოვის საპატრიარქოს ჟურნალები და ვთხოვე, იქნება ქადაგებები მაინც ეთარგმნათ. ერთი-ორი კვირის შემდეგ მოვიდნენ და მითხრეს, ჩვენ ვერ ვთარგმნითო ამას, ქართველი მკითხველისთვის ნამეტანი უბრალოა ეს და ჯობია ჩვენ ვიფიქროთ ახალ გამოცემებზეო. მაშინ დაიბადა ეს იდეა. ეს ტრილოგია გამოხატავს ჩვენს ინტელექტს, ჩვენს პოტენციალს, რა შეუძლია ქართველს გააკეთოს, როგორი დონეა ჩვენი აზროვნების. შედეგი ჩვენს წინაშეა და ეს შედეგი საოცარია. მე მინდა მადლობა მოგახსენოთ ყველას, ვინც იშრომა და მოგიწოდებთ ყველას, ეს იყოს მხოლოდ დასაწყისი და ვიფიქროთ მომავალზე", - განაცხადა ილია მეორემ.